ڈکی بھائی کی عدالت میں پیشی،یوٹیوب چینل واپسی کا مطالبہ

لاہور: یوٹیوبر سعد الرحمان عرف ڈکی بھائی جوا ایپس کی تشہیر اور ترغیب کے مقدمے میں ضلع کچہری لاہور میں پیش ہوئے اور عدالت میں اپنا بیان حلفی جمع کروایا۔

بیان حلفی میں ڈکی بھائی نے مطالبہ کیا کہ ان کا یوٹیوب چینل واپس فراہم کیا جائے اور این سی سی آئی اے کے اعتراضات والی 17 ویڈیوز پر کسی قسم کی چھیڑ چھاڑ نہ کی جائے۔ انہوں نے واضح کیا کہ یہ 17 ویڈیوز نہ ڈیلیٹ کی جائیں گی اور نہ ایڈٹ کی جائیں گی، کیونکہ یوٹیوب چینل ہی ان کا واحد ذریعہ معاش ہے اور چینل تک رسائی نہ ہونے کی وجہ سے انہیں مالی نقصان کا سامنا کرنا پڑ رہا ہے۔

عدالت نے اس معاملے پر این سی سی آئی اے سے جواب طلب کر لیا ہے۔

واضح رہے کہ ڈکی بھائی کو 17 اگست کو جوا ایپس کے ذریعے منی لانڈرنگ کے الزام میں لاہور ایئرپورٹ سے بیرون ملک جاتے ہوئے گرفتار کیا گیا تھا۔ لاہور ہائیکورٹ نے 10 لاکھ روپے کے مچلکوں کے عوض ان کی درخواست ضمانت منظور کی اور 26 نومبر کو انہیں ضمانت پر رہا کیا گیا تھا۔

ضمانت پر رہائی کے بعد ڈکی بھائی نے دوبارہ یوٹیوب پر واپسی کی اور اپنی پچھلی ویڈیو میں وی لاگ کی کمائی اور چینل سے متعلق معاملات پر کھل کر گفتگو کی۔