یہ بات غلط ہے پی ٹی آئی کیلئےکوئی راستہ نہیں چھوڑا گیا،رانا ثنا اللہ

وزیراعظم کے مشیر رانا ثنا اللہ نے کہا ہے کہ یہ بات بالکل غلط ہے کہ تحریک انصاف کے لیے کوئی راستہ نہیں چھوڑا گیا۔ انہوں نے بتایا کہ وزیراعظم نے چار بار مذاکرات کے دروازے کھولنے کی کوشش کی، لیکن تحریک انصاف کا رویہ بغاوت اور مخالفین کو ختم کرنے تک محدود رہا۔

انٹرویو میں رانا ثنا اللہ نے کہا کہ ایک گروہ افراتفری، انارکی اور فتنہ پھیلانے میں مصروف ہے، اور اگر انہوں نے قانون ہاتھ میں لیا تو قانون خود اپنا راستہ چنے گا۔ انہوں نے مزید کہا کہ ان کی جدوجہد کا انداز الگ ہے، اس لیے ہماری تیاری بھی اسی کے مطابق ہوگی۔

یاد رہے کہ وزیراعلیٰ خیبرپختونخوا کے معاون خصوصی شفیع جان نے کہا کہ 8 فروری کو پہیہ جام اور شٹر ڈاؤن ہڑتال کی کال دی گئی ہے، اور اسٹریٹ موومنٹ کی تیاری جاری ہے۔ انہوں نے بتایا کہ تحریک کی ذمہ داری محمود خان اچکزئی کے پاس ہے اور جب بھی کال دی جائے گی، لاکھوں لوگ احتجاج میں شریک ہوں گے۔ شفیع جان نے کہا کہ اس بار احتجاج پوری تیاری کے ساتھ ہوگا اور نیکسٹ لیول کی تحریک چلائی جائے گی۔