پی ٹی آئی سنجیدہ ہو تو حکومت مذاکرات کے لیے تیار ہے:وزیراعظم

وزیراعظم شہباز شریف نے کہا ہے کہ اگر پاکستان تحریکِ انصاف سنجیدہ مذاکرات پر آمادہ ہے تو حکومت بھی بات چیت کے لیے تیار ہے، تاہم غیر قانونی مطالبات اور بلیک میلنگ کے ساتھ مذاکرات ممکن نہیں۔ ان کا کہنا تھا کہ صرف جائز اور آئینی نکات پر ہی ڈائیلاگ آگے بڑھ سکتا ہے۔

وفاقی کابینہ کے اجلاس سے گفتگو کرتے ہوئے وزیراعظم نے کہا کہ حالیہ دنوں میں پی ٹی آئی اور اس کے اتحادی مذاکرات کی بات کر رہے ہیں۔ اگر ان کی نیت واقعی سنجیدہ ہے تو حکومتِ پاکستان بھی مذاکرات کے دروازے کھلے رکھنے کے لیے تیار ہے۔

انہوں نے واضح کیا کہ وہ پارلیمنٹ میں متعدد بار اس بات کا اظہار کر چکے ہیں کہ حکومت سیاسی مکالمے پر یقین رکھتی ہے، لیکن کسی قسم کی غیر آئینی شرائط یا دباؤ کو قبول نہیں کیا جا سکتا۔

وزیراعظم شہباز شریف کا کہنا تھا کہ ملک کی ترقی اور خوشحالی کے لیے تمام سیاسی جماعتوں کے درمیان اتفاقِ رائے اور ہم آہنگی ناگزیر ہے۔