ایرانی جوہری پروگرام کا حل صرف مکالمے سے ممکن ہے،پاکستان کا مؤقف

ایران کے جوہری پروگرام سے متعلق امور پر پاکستان نے ایک بار پھر مکالمے اور سفارت کاری پر زور دیا ہے۔

اقوامِ متحدہ میں پاکستان کے قائم مقام مستقل مندوب عثمان جدون نے سلامتی کونسل کے اجلاس سے خطاب کرتے ہوئے کہا کہ ایران کے جوہری معاملے کا کوئی بھی پائیدار حل تصادم کے بجائے بات چیت کے ذریعے ہی ممکن ہے۔ ان کا کہنا تھا کہ کسی متبادل انتظام پر اتفاق ہونے تک جے سی پی او اے کے فریم ورک کو برقرار رکھا جانا ضروری ہے۔

عثمان جدون نے کہا کہ حالیہ مہینوں میں سلامتی کونسل کے اندر اور باہر اختلافات میں اضافہ ہوا ہے، جس کے باعث مسئلے کے حل کی کوششیں مزید پیچیدہ ہو گئی ہیں۔ انہوں نے زور دیا کہ سفارت کاری کو کامیاب ہونے کے لیے مزید وقت دیا جانا چاہیے۔

پاکستانی مندوب کا کہنا تھا کہ صورتحال پہلے ہی اقوامِ متحدہ کے منشور کی خلاف ورزیوں اور طاقت کے یکطرفہ استعمال کے باعث پیچیدہ ہو چکی ہے، تاہم اس معاملے پر پاکستان کا مؤقف واضح اور بدستور برقرار ہے کہ بات چیت ہی آگے بڑھنے کا واحد مؤثر راستہ ہے۔