کراچی میں موٹرسائیکل سواروں کے لیے بڑی خوشخبری

کراچی میں موٹرسائیکل سواروں کے لیے بڑی خوشخبری سامنے آ گئی ہے، جہاں حکومتِ سندھ بھاری ٹریفک جرمانے کم کرنے پر متفق ہو گئی ہے۔

تفصیلات کے مطابق کراچی میں ای چالانز سے متعلق سندھ اسمبلی کی خصوصی کمیٹی کا اجلاس منعقد ہوا، جس کی صدارت صوبائی وزیر داخلہ ضیا الحسن لنجار نے کی۔ اجلاس میں اپوزیشن لیڈر علی خورشیدی کے مطالبے پر حکومت نے موٹر سائیکلوں کے بھاری چالانز میں کمی پر اصولی اتفاق کر لیا۔

ذرائع کے مطابق 1000 سی سی تک کی گاڑیوں کے جرمانوں میں بھی کمی کیے جانے پر غور کیا جا رہا ہے، جس سے شہریوں کو ریلیف ملنے کی توقع ہے۔ اجلاس کے دوران اپوزیشن لیڈر علی خورشیدی نے مؤقف اختیار کیا کہ صرف جرمانے بڑھانا ٹریفک مسائل کا حل نہیں، بلکہ فعال ٹریفک سگنلز، واضح لین مارکنگ اور بہتر انفرا اسٹرکچر بھی ناگزیر ہے۔

انہوں نے کہا کہ کراچی کی بیشتر سڑکوں پر نہ مناسب لین مارکنگ موجود ہے اور نہ ہی ٹریفک سگنلز درست طریقے سے کام کر رہے ہیں، ایسے میں غریب اور متوسط طبقے پر بھاری جرمانے عائد کرنا ناانصافی ہے۔ علی خورشیدی کا کہنا تھا کہ ٹریفک قوانین کے نفاذ میں شفافیت اور اصلاحات ضروری ہیں، اور انفرا اسٹرکچر کی بہتری کے بغیر سخت جرمانے قابلِ قبول نہیں۔

اجلاس میں اس بات پر زور دیا گیا کہ ای چالان نظام کے مؤثر اور منصفانہ نفاذ کے لیے عملی اقدامات کیے جائیں گے تاکہ شہریوں کو غیر ضروری مشکلات کا سامنا نہ کرنا پڑے۔