قائداعظم کا 149 واں یوم پیدائش،مزار قائد پر پروقار گارڈز تبدیلی کی تقریب

آج پاکستان بھر میں بابائے قوم، قائداعظم محمد علی جناحؒ کا 149 واں یوم پیدائش عقیدت و احترام اور ملی جوش و خروش کے ساتھ منایا جا رہا ہے۔ اس موقع پر ملک بھر میں عام تعطیل بھی ہے۔

بانیٔ پاکستان کے یوم پیدائش کے موقع پر مزار قائد پر گارڈز کی تبدیلی کی پروقار تقریب کا انعقاد کیا گیا، جس کے مہمان خصوصی میجر جنرل افتخار حسین چوہدری (ہلال امتیاز) تھے۔ اس موقع پر پاک فوج کے چاق و چوبند دستے نے مزار قائد پر سلامی دی جبکہ فوج کے کیڈٹس نے گارڈز کے فرائض سنبھال لیے۔

یومِ قائد کے موقع پر ملک بھر میں سرکاری اور غیر سرکاری سطح پر تقاریب منعقد ہوں گی، جن میں قائداعظم کی مسلمانوں کے لیے انتھک جدوجہد اور پاکستان کے قیام میں ان کی خدمات کو خراجِ عقیدت پیش کیا جائے گا۔

قائداعظم محمد علی جناح 25 دسمبر 1876 کو کراچی میں پیدا ہوئے۔ پیشے کے لحاظ سے وہ وکیل اور سیاست دان تھے، جنہوں نے اپنی قائدانہ صلاحیتوں سے ایک آزاد ریاست کا خواب حقیقت میں بدلا۔ ایمان، اتحاد اور تنظیم پر مبنی اصول ان کی زندگی کا نچوڑ تھے، اور ان کے کردار و عمل نے دنیا کو دکھایا کہ سچی اور دیانت دار قیادت کیا کر سکتی ہے۔

قائداعظم نے نہرو، پٹیل اور گاندھی جیسے سیاستدانوں کے باوجود قوم کو پاکستان کی منزل تک پہنچایا۔ ان کا خواب ایک ایسا پاکستان تھا جہاں ہر فرد کو مساوی حقوق اور آزادی حاصل ہو۔ قائداعظم محمد علی جناح تاریخ کی چند ایسی شخصیات میں شامل ہیں جنہوں نے دو قومی نظریے کی بنیاد پر مسلمانوں کے لیے علیحدہ وطن حاصل کرایا، اور ان کا یہ عظیم کارنامہ کبھی نہیں بھلایا جا سکتا۔