پی ٹی اے نے تمام سمز صارف کے نام پر رجسٹرڈ کرنا لازمی قرار دے دیا

پاکستان ٹیلی کمیونیکیشن اتھارٹی (پی ٹی اے) نے اعلان کیا ہے کہ اب تمام سمز کا صارف کے اپنے نام پر رجسٹر ہونا لازمی ہوگا۔ پی ٹی اے نے ٹیلی کام صارفین کے لیے سم کے ذمہ دارانہ استعمال سے متعلق ہدایت نامہ جاری کیا ہے۔

اعلامیے کے مطابق کسی اور کے نام پر رجسٹرڈ سم کا استعمال قانون کی خلاف ورزی ہے اور سم کے غلط استعمال کی مکمل ذمہ داری رجسٹرڈ صارف پر ہوگی۔ صارفین اپنی سمز اور ٹیلی کمیونیکیشن کنکشنز کا ذمہ دارانہ استعمال یقینی بنائیں، اور اپنی ڈیوائس سے ہونے والی تمام کالز، میسجز اور ڈیٹا کے استعمال کے لیے خود ذمہ دار ہوں گے۔

پی ٹی اے نے واضح کیا کہ صارفین پر لازم ہے کہ وہ تمام متعلقہ قواعد و ضوابط کی پابندی کریں، ورنہ خلاف ورزی کی صورت میں قانونی کارروائی عمل میں لائی جا سکتی ہے۔ ادارے نے صارفین سے اپیل کی ہے کہ وہ ذمہ دارانہ طرزِ عمل اپنانے کے ذریعے مواصلاتی نظام کے تحفظ اور استحکام میں مؤثر کردار ادا کریں۔