مریم نواز اور عظمیٰ بخاری کے خلاف توہین عدالت کی درخواست دائر

لاہور: لاہور ہائیکورٹ میں وزیر اعلیٰ پنجاب مریم نواز اور عظمیٰ بخاری کے خلاف توہین عدالت کی درخواست دائر کر دی گئی ہے۔

درخواست شہری منیر احمد نے اظہر صدیق ایڈوکیٹ کی وساطت سے دائر کی ہے۔ درخواست میں موقف اختیار کیا گیا کہ پنجاب پراپرٹی اونرشپ ایکٹ سے متعلق عدالتی حکم پر تنقیدی بیانات توہین عدالت کے زمرے میں آتے ہیں اور پراپرٹی قانون کی معطلی کے حوالے سے دیے گئے بیانات سے عدلیہ کی ساکھ متاثر ہوئی ہے۔

درخواست میں مزید کہا گیا کہ وزیر اعلیٰ پنجاب کے بیانات نے عدالت کو متنازعہ بنانے کی کوشش کی اور عدالتی حکم کو لینڈ مافیا کے حق میں قرار دینا سنگین الزام ہے۔ لاہور ہائیکورٹ کے حکم کو سیاسی رنگ دینا غیر قانونی عمل ہے۔

درخواست گزار نے استدعا کی ہے کہ اعلیٰ عہدیداران کے بیانات عدالتی عمل کو متاثر کر سکتے ہیں، لہٰذا مریم نواز اور عظمیٰ بخاری کو توہین عدالت کا شوکاز نوٹس جاری کیا جائے اور لاہور ہائیکورٹ ان کے خلاف قانونی کارروائی کرے۔