پنجگور میں سیکیورٹی فورسز کا آپریشن،4 بھارتی اسپانسرڈ خوارج ہلاک

راولپنڈی: آئی ایس پی آر کے مطابق 26 دسمبر 2025 کو سیکیورٹی فورسز نے بلوچستان کے ضلع پنجگور میں انٹیلی جنس پر مبنی آپریشن کیا۔ کارروائی بھارتی پراکسی فتنہ الخوارج سے تعلق رکھنے والے دہشت گردوں کی موجودگی کی اطلاع پر کی گئی۔

آپریشن کے دوران سیکیورٹی فورسز نے خوارج کے ٹھکانے کو مؤثر طریقے سے نشانہ بنایا، جس کے نتیجے میں شدید فائرنگ کا تبادلہ ہوا۔ فائرنگ کے دوران چار بھارتی اسپانسرڈ خوارج ہلاک ہو گئے۔

آئی ایس پی آر کے مطابق ہلاک ہونے والے دہشت گرد علاقے میں دہشت گردی کی متعدد کارروائیوں میں ملوث تھے۔ کارروائی کے دوران دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد کر لیا گیا۔

بیان میں کہا گیا ہے کہ علاقے میں موجود کسی بھی دوسرے بھارتی حمایت یافتہ خارجی کو ختم کرنے کے لیے کلیئرنس آپریشن جاری ہے۔ پاکستان کی سیکیورٹی فورسز اور قانون نافذ کرنے والے ادارے وژن “اعظمی استحکام” کے تحت ملک سے غیر ملکی اسپانسر شدہ دہشت گردی کے مکمل خاتمے کے لیے پُرعزم ہیں۔