وزیراعلیٰ پنجاب نے تاریخ کی سب سے بڑی ٹریکٹر سکیم کاریکارڈ قائم کر دیا

لاہور: وزیراعلیٰ پنجاب مریم نواز شریف نے 30 ہزار ٹریکٹرز پر مشتمل چیف منسٹر ٹریکٹر پروگرام متعارف کرا کر تاریخ کی سب سے بڑی ٹریکٹر سکیم کا ریکارڈ قائم کر دیا ہے۔ اس منصوبے کا بنیادی مقصد پنجاب کے کاشتکاروں کو معاشی طور پر مضبوط بنانا اور زرعی پیداوار میں نمایاں اضافہ کرنا ہے۔

چیف منسٹر ٹریکٹر پروگرام کے پہلے مرحلے میں 50 سے 75 ہارس پاور کے 10 ہزار ٹریکٹرز کسانوں میں تقسیم کیے جا چکے ہیں، جبکہ دوسرے مرحلے میں 75 سے 85 ہارس پاور کے مزید 10 ہزار ٹریکٹرز کی قرعہ اندازی مکمل کر لی گئی ہے اور ان کی فراہمی کا عمل جاری ہے۔

حکومت پنجاب کی جانب سے ہر ہائی ہارس پاور ٹریکٹر پر 10 لاکھ روپے سبسڈی دی جا رہی ہے، جبکہ اس مد میں مجموعی طور پر 10 ارب روپے مختص کیے گئے ہیں تاکہ زیادہ سے زیادہ کسان اس سہولت سے مستفید ہو سکیں۔

حکام کے مطابق وزیراعلیٰ پنجاب ٹریکٹر سکیم کا تیسرا مرحلہ جنوری میں شروع کیا جائے گا، جس کے تحت 50 سے 55 ہارس پاور کے ٹریکٹرز کے لیے وسط جنوری سے درخواستیں طلب کی جائیں گی۔ اس کے علاوہ ہائی ٹیک فارم میکانائزیشن فنانسنگ پروگرام کے تحت 100 سے 120 ہارس پاور کے بڑے ٹریکٹرز بلاسود قرضوں پر فراہم کیے جائیں گے۔

اس موقع پر وزیراعلیٰ مریم نواز شریف کا کہنا تھا کہ ٹریکٹر سکیم کا مقصد پنجاب کے کاشتکاروں کو خود مختار بنانا اور زرعی پیداوار میں اضافہ کرنا ہے۔ ان کا کہنا تھا کہ کسان بھائیوں کا اپنے ٹریکٹر کا مالک بننا حکومت کے لیے باعثِ فخر ہے۔

وزیراعلیٰ نے مزید کہا کہ حکومت پنجاب کسانوں کو فصل کی بوائی سے لے کر فروخت تک ہر مرحلے پر مکمل تعاون فراہم کر رہی ہے۔ جدید زرعی مشینری کی فراہمی سے پنجاب زراعت میں خود کفالت کی جانب بڑھے گا اور حکومت عملی اقدامات کے ذریعے کسانوں کا حقیقی سہارا بنے گی۔