راولپنڈی:ہولی فیملی اسپتال میں زندہ بچے کا ڈیتھ سرٹیفکیٹ جاری

راولپنڈی: ہولی فیملی اسپتال میں نومولود بچے کے زندہ ہونے کے باوجود ڈاکٹرز نے اس کا ڈیتھ سرٹیفکیٹ جاری کر دیا۔ والدین نے بچے کی حالت خراب ہونے کی وجہ سے سرٹیفکیٹ وصول کیا، لیکن بعد میں بچے کی سانس چلتی دیکھ کر فوری طور پر وینٹی لیٹر پر منتقل کر دیا۔

والدین کے مطابق بچے کی پیدائش گزشتہ روز ہوئی تھی اور ڈاکٹرز نے ڈیتھ سرٹیفکیٹ پر میت لواحقین کے حوالے کرنے کی تصدیق کی۔ جب بچے کو وصول کیا گیا تو اس کی سانس چل رہی تھی اور اوکسیجن ماسک کے ساتھ زندہ پایا گیا۔

اسپتال انتظامیہ نے بتایا کہ بچہ Lazarus syndrome کا شکار تھا، جس میں سانس مدہم ہو جاتی ہے۔ معاملے کی انکوائری کے لیے کمیٹی قائم کر دی گئی ہے اور ڈیتھ سرٹیفکیٹ جاری کرنے میں ذمہ دار افراد کے خلاف کارروائی کی جائے گی۔