شدید دھندکے باعث 6 موٹرویزاور سوات ایکسپریس وے بند

مختلف علاقوں میں شدید دُھند کے باعث 6موٹرویز پر حدِ نگاہ متاثر ہونے سے ٹریفک کی آمدورفت معطل کر دی گئی۔ نیشنل ہائی وے اور موٹروے پولیس کے مطابق حفاظتی خدشات کے پیشِ نظر متعدد اہم موٹرویز کو عارضی طور پر بند کیا گیا ہے۔

موٹروے ایم-1 برہان تا پشاور ، ایم-2 ٹھوکر نیاز بیگ تا چکری انٹرچینج تک بند ہے۔ اسی طرح ایم-3 درخانہ سے فیض پور، ایم-4 شیر شاہ سے پنڈی بھٹیاں، اور ایم-5 روہڑی تا ملتان ٹریفک کے لیے بند کر دی گئی ہے۔

موٹر وے پولیس کے مطابق ایم-14 تھٹّی کلراںسے عیسیٰ خیل تک بند ہے۔ سوات ایکسپریس وے کرنل شیر خان انٹرچینج سے کاٹلنگ تک بند کر دی گئی ہے۔

موٹروے پولیس نے مسافروں کو ہدایت کی ہے کہ وہ غیر ضروری سفر سے گریز کریں اور سفر سے قبل تازہ صورتحال کے لیے ہیلپ لائن یا سرکاری ذرائع سے معلومات حاصل کریں۔
موٹر وے پولیس کا کہناہے کہ دُھند چھٹنے اور موسم بہتر ہونے پر سڑکیں مرحلہ وار کھول دی جائیں گی۔