مولانا فضل الرحمان 3روزہ دورے پر ہفتے کو لاہور جائیں گے،اہم ملاقاتیں طے

لاہور: جے یو آئی(ف) کے سربراہ مولانا فضل الرحمٰن3 روزہ دورے پر کل لاہور پہنچیں گے۔

ترجمان جے یو آئی پنجاب کے مطابق 11 جنوری کو صبح 10 بجے مولانا فضل الرحمٰن جامعہ اشرفیہ لاہور میں تعزیتی اجتماع و مدارس کنونشن سے خطاب کریں گے۔ بعد نماز ظہر جامعہ مدنیہ جدید رائیونڈ روڈ لاہور میں ختم بخاری کے اجتماع سے خطاب کریں گے، مولانا فضل الرحمٰن 12 جنوری کو بعد نماز ظہر صوبائی ڈیجیٹل میڈیا کنونشن سے خطاب کریں گے۔

حافظ غضنفر عزیز نے بتایا کہ سربراہ جے یو آئی اس دورے میں علما کرام، سماجی شخصیات، جماعتی ذمے داران اور پارٹی ورکرز سے ملاقاتیں کریں گے۔ دورے میں مرکزی کوآرڈینیٹر انجینئر ضیا الرحمٰن، صوبائی امیر مولانا صفی اللہ، سیکریٹری جنرل حافظ نصیر احمد احرار ودیگر بھی ہمراہ ہوں گے۔