دہشت گرد بلوچستان کے ترقیاتی منصوبے سبوتاژ نہیں کر پائیں گے،کور کمانڈر کوئٹہ

 کوئٹہ: کور کمانڈر کوئٹہ نے کہا ہے کہ بھارتی ایما پر دہشت گرد بلوچستان کے ترقیاتی منصوبوں کو سبوتاژ کرنے کی کوشش کر رہے ہیں۔

کور کمانڈر نے بلوچستان کے علاقے بسیمہ میں مقامی افراد سے ملاقات کی، جس میں تاجروں، اساتذہ، معززین اور نوجوانوں سمیت دیگر سٹیک ہولڈرز بھی شامل تھے۔ مقامی آبادی نے عوام سے براہِ راست رابطے پر کور کمانڈر کا شکریہ ادا کیا اور ملاقات کو مسائل کے حل کی جانب مثبت قدم قرار دیا۔

کور کمانڈر کوئٹہ نے کہا کہ پاک فوج سول انتظامیہ کے ساتھ مل کر ترقیاتی منصوبے جاری رکھے ہوئے ہے، جن کا مقصد مقامی آبادی کو بہتر سہولیات اور معیار زندگی فراہم کرنا ہے۔ انہوں نے بھارتی سرپرستی میں دہشت گردوں کے منفی پروپیگنڈے کو بھی مسترد کر دیا۔

کور کمانڈر نے مزید کہا کہ دشمن عناصر عوام کو بہتر زندگی سے محروم اور علاقے کے امن کو عدم استحکام کا شکار بنانا چاہتے ہیں، تاہم پاک فوج مقامی تعاون سے امن اور خوشحالی یقینی بنائے گی۔