وفاقی وزیر داخلہ محسن نقوی نے نیشنل پولیس اکیڈمی کا دورہ

وفاقی وزیر داخلہ محسن نقوی نے نیشنل پولیس اکیڈمی کا دورہ کیا اور اکیڈمی کی تزئین و آرائش کے کام کا معائنہ کیا۔ دورے کے موقع پر وزیر داخلہ نے کمانڈنٹ نیشنل پولیس اکیڈمی محمد ادریس کو ضروری ہدایات بھی دیں۔

وزیر داخلہ نے زیر تربیت اے ایس پیز سے خطاب کرتے ہوئے کہا کہ پاسنگ آؤٹ پر انہیں پلاٹ دیے جائیں گے اور موجودہ پولیس بیچ کو بین الاقوامی معیار کے مطابق تیار کیا جائے گا۔ انہوں نے مزید کہا کہ اے ایس پیز کو ایک ماہ کی تربیت کے لیے بیجنگ، چین بھیجا جائے گا اور تربیتی پروگرام میں جدید تقاضوں کے مطابق ماڈیولز شامل کیے جائیں گے۔

محسن نقوی نے کہا کہ افسران کی پیشہ وارانہ قابلیت اور عملی مہارت بڑھانے کے لیے اقدامات یقینی بنائے جائیں گے اور پولیس افسران کی مالی مشکلات دور کرنے کے لیے خصوصی اقدامات کیے جا رہے ہیں۔ انہوں نے کہا کہ ہر افسر کی تنخواہ بہتر بنانے، جدید سہولیات فراہم کرنے اور پروموشن کے مسائل حل کرنے پر بھی کام کیا جائے گا۔

کمانڈنٹ نیشنل پولیس اکیڈمی نے وزیر داخلہ کو بریفنگ دی جبکہ ڈپٹی کمانڈنٹ نیشنل پولیس اکیڈمی، ایڈیشنل ڈپٹی کمشنر اسلام آباد سمیت دیگر افسران بھی ان کے ہمراہ تھے۔