مسلمان طلباکومیرٹ پرزیادہ داخلے۔انتہاپسندہندوئوں نے مقبوضہ کشمیرمیں میڈیکل کالج بند کرادیا

 

انتہا ہندو گروپوں کے دبائو پر مقبوضہ کشمیر میں ایک میڈیکل کالج اس لیے بند کردیاگیاہے کہ وہاں میرٹ پر مسلمان طلبا کو زیاد ہ تعدادمیں داخلے ملے تھے۔

نیشنل میڈیکل کمیشن (NMC)، طبی تعلیم اور طرز عمل کے لیے ایک وفاقی ریگولیٹری اتھارٹی، نے 6 جنوری کو شری ماتا ویشنو دیوی میڈیکل انسٹی ٹیوٹ (SMVDMI) کی سرکاری منظوری کو منسوخ کر دیا، جو پہاڑی ضلع ریاسی میں واقع ہے۔

نومبر میں پانچ سالہ بیچلرز ان میڈیسن (ایم بی بی ایس) پروگرام میں شامل ہونے والے 50 طلبا میں سے 42 مسلمان اور سے زیادہ تر کشمیر کے رہائشی تھے، سات ہندو اور ایک سکھ تھا۔ یہ ایم بی بی ایس کا پہلا بیچ تھا جسے ایک ہندو مذہبی خیراتی ادارے نے قائم کیا تھا اور اسے جزوی طور پر حکومت کی طرف سے مالی امداد فراہم کی جارہی تھی۔بھارتی میڈیکل کالجوں ، خواہ سرکاری ہوں یا نجی، میں داخلےایک مرکزی داخلہ امتحان سے ہوتے ہیں، جسے نیشنل انٹرنس ایگزامینیشن ٹیسٹ (NEET) کہا جاتا ہے، جو وفاقی وزارت تعلیم کی نیشنل ٹیسٹنگ ایجنسی (NTA) کے ذریعے کرایا جاتا ہے۔

مزید پڑھیں:مقبوضہ کشمیر میں مسلم طلباکی قابلیت نے دھاک بٹھادی۔ ہندوتواعناصر خائف

 

1 لاکھ 20 ہزارایم بی بی ایس نشستوں میں سے ایک پرداخلہ حاصل کرنے کی امید میں ہر سال 20 لاکھ سے زیادہ طلباٹیسٹ میں شامل ہوتے ہیں۔ امیدوار عام طور پر سرکاری کالجوں کو ترجیح دیتے ہیں، جہاں فیسیں کم ہیں ۔

مقامی انتہاپسندہندو گروپوں کو نومبر میں کالج کے افتتاحی بیچ کے بارے میں پتہ چلاکہ اس میں مسلمان طلباوطالبات کو زیادہ داخلے ملے ہیں ، انہوں نے مظاہرے شروع کر دیے اور مطالبہ کیا کہ مسلمان طلباء کے داخلوں کو ختم کر دیا جائے۔ ان کا استدلال تھا کہ چونکہ کالج کو بنیادی طور پر کشمیر میں ایک ممتاز ہندو عبادت گاہ ماتا ویشنو دیوی مندر کے عقیدت مندوں کے نذرانے سے فنڈ فراہم کیا جاتا تھا، اس لیے مسلمان طلباء کا وہاں کوئی کام نہیں ۔یہ احتجاج ہفتوں تک جاری رہا، مظاہرین ہر روز کالج کے باہر جمع ہوتے اور نعرے لگاتے۔

مظاہروں میں شدت آ نے پرنیشنل میڈیکل کمیشن نے 6 جنوری کو اعلان کیا کہ اس نے کالج کی اجازت کو منسوخ کر دیا ہے کیونکہ وہ حکومت کی طرف سے طبی تعلیم کے لیے مخصوص کردہ کم سے کم معیاری تقاضوں کو پورا کرنےمیں ناکام رہا ہے۔این ایم سی نے دعویٰ کیا کہ کالج کو اپنی تدریسی فیکلٹی، بستروں ، اوپی ڈی میں مریضوں کی تعداد، لائبریریوں اور آپریٹنگ تھیٹروں میں شدید کمی کا سامنا ہے۔ اگلے دن اجازت نامہ واپس لے لیا گیا۔لیکن میڈیاسے بات کرنے والے زیادہ تر طلباء نے بتایاکہ انہیں کالج میں کوئی کمی نظر نہیں آئی اور یہ کورس جاری رکھنے کے لیے تمام سہولیات سے اچھی طرح سے لیس ہے۔ایک طالب علم نے بتایا کہ ہم نے دوسرے کالج دیکھے ہیں۔ ان میں سے کچھ کے پاس طبی تجربات کے لیے صرف ایک جسم ہے، لیکن اس کالج میں چار ہیں۔ ہر طالب علم کو انفرادی طور پر کام کرنے کا موقع ملا۔

وزیر اعظم نریندر مودی کی بھارتیہ جنتا پارٹی (بی جے پی) سے تعلق رکھنے والے مقامی قانون ساز، جس پر 2014 میں اقتدار میں آنے کے بعد سے مسلم مخالف پالیسیاں اپنانے کا الزام لگایا گیا ہے،نے کشمیر کے لیفٹیننٹ گورنر کو درخواستیں بھی ارسال کی تھیں، جن میں ان پر زور دیا گیا کہ وہ صرف ہندو طلبہ کو داخلہ دیں۔آنے والے دنوں میں، ان کے مطالبات کالج کو ہی بند کرنے کی طرف چلے گئے۔

بی جے پی کے کشمیرمیں ترجمان الطاف ٹھاکر کا اصرار ہے کہ پارٹی نے کبھی یہ دعویٰ نہیں کیا کہ اس کالج میں مسلم طلبا ناپسندیدہ ہیں، لیکن اس کالج کا نام ماتا ویشنو دیوی کے نام پر رکھا گیا ہے اور یہاں لاکھوں عقیدت مند ہیں جن کے مذہبی جذبات اس یادگارسے جڑے ہوئے ہیں۔

گزشتہ ہفتے، مقبوضہ کشمیر کے وزیر اعلیٰ عمر عبداللہ نے اس حوالے سے کہا تھا کہ کالج کے طلباء کو نیشنل میڈیکل کمیشن کے فیصلے کی وجہ سے نقصان نہیں اٹھانا پڑے گااور انہیں دیگر کالجوں میں داخلے دیئے جائیں گے۔ انہوں نے کہاکہ ان بچوں نے داخلوں کے امتحان میں کامیابی حاصل کی، اور یہ ہماری قانونی ذمہ داری ہے کہ ہم ان کو ایڈجسٹ کریں۔ ہمارے پاس غیر معمولی نشستیں ہوں گی، اس لیے ان کی تعلیم متاثر نہیں ہوگی۔ ہمارے لیے تمام 50 طلبہ کو ایڈجسٹ کرنا مشکل نہیں ، اور ہم یہ کریں گے۔