بشریٰ بی بی کی بیٹی نے والدہ سے ملاقات کے لیے عدالت سے رجوع کر لیا

لاہور: بشریٰ بی بی کی بیٹی نے اڈیالہ جیل میں والدہ سے ملاقات کے لیے لاہور ہائیکورٹ سے رجوع کر لیا ہے۔ درخواست مبشرہ خاور مانیکا کی جانب سے صدر لاہور ہائیکورٹ بار آصف نسوانہ کے توسط سے دائر کی گئی۔

درخواست میں پنجاب حکومت، سپرنٹنڈنٹ اڈیالہ جیل اور دیگر متعلقہ افراد کو فریق بنایا گیا ہے۔ درخواست میں مؤقف اختیار کیا گیا کہ بشریٰ بی بی اس وقت اڈیالہ جیل میں قید ہیں اور درخواست گزار ان کی حقیقی بیٹی ہیں۔

درخواست میں مزید کہا گیا کہ جیل رولز کے مطابق درخواست گزار کو والدہ سے ملاقات کا حق حاصل ہے اور شیڈول کے مطابق ہر منگل کو فیملی سے ملاقات کا دن مقرر کیا گیا ہے۔ تاہم بار بار کوششوں کے باوجود سپرنٹنڈنٹ اڈیالہ جیل ملاقات کی اجازت نہیں دے رہے۔

درخواست گزار نے عدالت سے استدعا کی ہے کہ سپرنٹنڈنٹ اڈیالہ جیل کو والدہ سے فوری ملاقات کرانے کا حکم دیا جائے۔