پنجاب میں تعلیمی سرگرمیاں بحال، اسکول آج سے کھل گئے

پنجاب بھر میں سرکاری اور نجی تعلیمی ادارے آج سے دوبارہ کھل گئے ہیں، جس کے ساتھ ہی موسمِ سرما کی تعطیلات کا اختتام ہو گیا۔ محکمہ تعلیم کے مطابق صوبے میں سردیوں کی چھٹیاں 20 دسمبر سے شروع ہوئیں تھیں، جو مجموعی طور پر 30 دن تک جاری رہیں۔

تعطیلات کے بعد آج سے اسکولوں، کالجوں اور دیگر تعلیمی اداروں میں تدریسی عمل بحال کر دیا گیا ہے۔ اس موقع پر محکمہ تعلیم پنجاب نے سرکاری اسکولوں کے لیے نئے اوقاتِ کار کا باضابطہ نوٹیفکیشن بھی جاری کر دیا ہے۔

نوٹیفکیشن کے مطابق نئے تعلیمی اوقات 19 جنوری سے 15 اپریل 2026 تک نافذ العمل رہیں گے۔ مزید بتایا گیا ہے کہ پیر سے جمعرات تک اساتذہ کے لیے CPD (کنٹینیوئس پروفیشنل ڈویلپمنٹ) اور نصابی تیاری کے سیشنز میں شرکت لازمی ہو گی، جس کا مقصد تدریسی معیار کو مزید بہتر بنانا ہے۔