سانحہ گل پلازا: لاشوں کی حالت انتہائی خراب , فوری شناخت ممکن نہیں، ڈاکٹر عابد

کراچی: چیف آپریٹنگ آفیسر ریسکیو 1122 ڈاکٹر عابد کا کہنا ہے کہ گل پلازا میں امدادی سرگرمیاں جاری ہیں، لاشوں کی حالت انتہائی خراب ہونے کے باعث فوری شناخت ممکن نہیں۔

ذرائع کا کہنا ہے کہ 30 سے زائد لاپتا افراد کے اہل خانہ نے سول ہسپتال میں ڈی این اے ٹیسٹ دے دیے،رزلٹ آنے کے بعد سب لاشیں شناخت کر کے لواحقین کے حوالے کی جائیں گی۔

ڈاکٹر عابد نے کہا کہ مربوط، منظم، مکمل طور پر تکنیکی بنیادوں پر سرچ اینڈ ریسکیو آپریشن جاری ہے، سرچ آپریشن کے لیے اربن سرچ اینڈ ریسکیو یونٹس اور ڈیزاسٹر ریسپانس وہیکل موجود ہیں، جدید اور پیشہ ورانہ طریقۂ کار کے تحت سرچ آپریشن کیا جا رہا ہے۔

انہوں نے کہا کہ 5 مختلف نشاندہی شدہ مقامات پر بیک وقت 3 سرچ آپریشنز جاری ہیں، سرچ آپریشن میں ریسکیو 1122 کی 3 ٹیمیں متحرک ہیں، ایک خصوصی ٹیم مسلسل فائر فائٹنگ اور کولنگ کے عمل میں مصروف ہے۔

خیال رہے کہ سانحہ گل پلازہ میں جاں بحق افراد کی تعداد 26 ہوگئی، 71 تاحال لاپتہ ہیں، رات سے اب تک 20 لاشیں نکالی گئی ہیں، آگ سے متاثرہ عمارت کا ایک اور حصہ گرگیا، آگ پر 33 گھنٹوں بعد قابو پایا گيا، کولنگ کا عمل ابھی جاری ہے۔

آگ بجھنے کا سنتے ہی اپنے پیاروں کی تلاش کے منتظر خستہ حال عمارت کے اندر دوڑ پڑے، زندگی کی تلاش کی امید ابھی باقی لیکن ساتھ ہی ملبہ ہٹانے کا کام بھی اب تیز ہونے لگا، لاپتا 29 افراد کی موبائل لوکیشن گل پلازہ کے اطراف کی آرہی ہے، لاپتا افراد کے لواحقین کو سول اسپتال میں اپنا ڈیٹا اور ڈی این اے نمونےجمع کروانے کی ہدایت کی گئی۔

آتشزدگی کے بعد اسپتال لائے گئے زخمی تمام 30 افراد کو اسپتالوں سے ڈسچارج کر دیا گیا، عمارت میں آگ لگنے کی سی سی ٹی وی ویڈیو بھی سامنے آگئی۔

ویڈیو میں آگ لگنے کا وقت رات 10 بج کر 22 منٹ ہے، آگ کے باعث گل پلازا کے ساتھ والی عمارت بھی متاثر ہوگئی، پلرز ٹیڑھے ہوگئے۔