سوات و چترال:بارش اور برفباری سے سردی کی شدت میں اضافہ

سوات اور چترال میں مغربی سسٹم کے اثرات کے تحت گزشتہ رات سے بارش اور بالائی علاقوں میں برفباری جاری ہے۔

چترال کے اپر اور لوئر علاقوں میں لواری ٹنل روڈ، کالاش ویلیز، مڈک لشٹ، گرم چشمہ، تورکھو، موڑکھو، مستوج اور یارخون میں برفباری ہوئی۔ لواری ٹنل روڈ پر برفباری کے باوجود آمدورفت جاری ہے، تاہم سڑکوں پر پھسلن کے باعث احتیاط کی ہدایت کی گئی ہے۔ برفباری سے مقامی سردی بڑھ گئی اور جلانے کی لکڑی کی قیمت میں بھی اضافہ دیکھا گیا۔

سوات کے میدانی علاقوں میں بارش کا سلسلہ رک گیا ہے، جبکہ کالام اور مالم جبہ میں ہلکی برفباری اور بارش کا سلسلہ جاری ہے۔ مقامی اور غیر مقامی سیاح برف پوش علاقوں کا رخ کر رہے ہیں، تاہم انتظامیہ اور سوات ڈویلپمنٹ اتھارٹی نے بغیر سنو چین گاڑیوں کے سفر پر پابندی لگا دی ہے۔

ترجمان سعید الرحمان نے کہا کہ سیاحوں کے تحفظ کے لیے مؤثر اقدامات کیے جا رہے ہیں اور احتیاطی تدابیر اختیار نہ کرنے والوں کے خلاف کارروائیاں جاری ہیں۔