عمران خان کے ایکس اکاؤنٹ بند کرنے کا کیس 24 فروری تک ملتوی

اسلام آباد: اسلام آباد ہائیکورٹ نے بانی پاکستان تحریک انصاف کے ایکس اکاؤنٹ بند کرنے کے کیس کی سماعت 24 فروری تک ملتوی کر دی ہے۔ کیس کی سماعت جسٹس ارباب محمد طاہر کی سربراہی میں ہوئی۔

دوران سماعت سلمان اکرم راجا نے عدالت کو بتایا کہ وہ بانی پی ٹی آئی سے مشاورت کے لیے ملاقات نہیں کر سکے۔ عدالت نے کہا کہ اگر ملاقات ہو جائے تو 24 فروری کو حتمی دلائل سنے جائیں گے۔

عدالت نے ملاقات نہ کرانے پر توہین عدالت کی درخواست پر تفصیلی جواب جمع کرانے کی ہدایت کی اور ایڈوکیٹ جنرل اسلام آباد سے تحریری جواب طلب کیا۔ سرکاری وکیل نے بتایا کہ ملاقاتوں کے کیسز ایک لارجر بنچ دیکھ رہا ہے اور جب تک ملاقات نہیں ہوگی، کیس آگے نہیں بڑھ سکے گا۔

سلمان اکرم راجا نے عدالت سے استدعا کی کہ جیل میں ملاقات کے لیے مناسب آرڈر جاری کیا جائے۔ جسٹس ارباب محمد طاہر نے کہا کہ ملاقات کرانے کے بعد کیس آگے بڑھ سکے گا اور اس حوالے سے مناسب احکامات جاری کیے جائیں گے۔

پی ٹی اے نے بھی کیس میں جواب داخل کرایا، تاہم عدالت نے اسے غیر تسلی بخش قرار دیتے ہوئے کہا کہ ’آپ دیکھ لیں رٹ پٹیشن کیا ہے اور آپ کا جواب کیا ہے‘۔