مریم نواز نے پاکستان کی پہلی الیکٹرک پیٹرولنگ گاڑی کا افتتاح کر دیا

وزیراعلیٰ پنجاب مریم نواز شریف نے پاکستان کی تاریخ میں پہلی گرین پولیسنگ یونٹ کا افتتاح کیا، جس کے تحت پیٹرولنگ کے لیے پہلی مرتبہ الیکٹرک گاڑی متعارف کرائی گئی ہے۔ یہ اعزاز پنجاب کو حاصل ہوا ہے۔

افتتاح کے موقع پر مریم نواز نے الیکٹرک پیٹرولنگ گاڑی کا معائنہ کیا اور خود گاڑی ڈرائیو بھی کی۔ انہیں گرین پولیسنگ یونٹ اور الیکٹرک وہیکل کے مختلف پہلوؤں پر تفصیلی بریفنگ دی گئی، جس میں بتایا گیا کہ لاہور میں جدید ترین بی وائی ڈی الیکٹرک گاڑی کے ذریعے ٹریفک اور پیٹرولنگ کے فرائض انجام دیے جائیں گے۔ یہ ماحول دوست گاڑی فی چارج تقریباً 410 کلومیٹر تک چل سکتی ہے۔

بریفنگ میں مزید بتایا گیا کہ گاڑی 30 سے 80 فیصد تک تقریباً 30 منٹ میں تیزی سے چارج ہو جاتی ہے اور اس میں سرویلنس کے لیے جدید پی اے سسٹم، پولیس لائٹس، 360 ڈگری کیمرہ اور اسپیڈ ڈیٹیکشن آلات نصب ہیں۔ روایتی پیٹرول گاڑیوں کی ماہانہ ایندھن کی کھپت تقریباً 28 ہزار لیٹر ہے جس پر 7.42 ملین روپے خرچ ہوتے ہیں، جبکہ الیکٹرک گاڑیوں کے استعمال سے فی گاڑی سالانہ تقریباً 4 ہزار 500 لیٹر ایندھن کی بچت ممکن ہے اور آپریشنل لاگت میں نمایاں کمی آئے گی۔

وزیراعلیٰ پنجاب نے ہدایت کی کہ الیکٹرک گاڑیوں کی تعداد بتدریج بڑھائی جائے اور گرین پولیسنگ یونٹ کو دیگر اضلاع میں بھی مرحلہ وار متعارف کروایا جائے۔ مریم نواز نے کہا کہ الیکٹرک گاڑیاں ایندھن کے اخراجات میں کمی اور زیرو کاربن اخراج کو یقینی بنائیں گی اور گرین پولیسنگ صاف ستھری فضا اور گڈ گورننس کے وژن کا عکاس ہے۔