مری میں 20 انچ تک برفباری متوقع،پنجاب حکومت کی ہدایات جاری

مری میں مغربی سسٹم کے اثرات کے تحت آج اور کل بارش اور 12 سے 20 انچ تک برف باری کی پیش گوئی کی گئی ہے، جس کے پیش نظر پنجاب حکومت نے اہم ہدایات جاری کر دی ہیں۔

صوبائی وزیر مواصلات ملک صہیب احمد بھرتھ مری پہنچے اور انتظامات کا جائزہ لیا۔ انہوں نے ڈسٹرکٹ ایڈمنسٹریشن کے اجلاس کی صدارت کی اور برف باری، روڈ کلیئرنگ اور لینڈ سلائیڈنگ سے نمٹنے کے اقدامات پر بریفنگ لی۔

وزیر مواصلات نے ہدایت کی کہ حساس شاہراہوں اور اہم پوائنٹس کی نشاندہی کی جائے، مری میں داخل ہونے والی گاڑیوں کی مسلسل مانیٹرنگ ہو اور کسی بھی ہنگامی صورتحال میں فوری رسپانس یقینی بنایا جائے۔ انہوں نے محکمہ موسمیات سے مکمل رابطہ رکھنے اور بروقت اپ ڈیٹس لینے پر بھی زور دیا۔

ملک صہیب احمد بھرتھ نے مری کی مختلف شاہراہوں، سالٹ کیمپس اور ٹورسٹ فیسلیٹیشن سینٹرز کا معائنہ کیا اور برف ہٹانے والی مشینری کا جائزہ لیا۔ انہوں نے کہا کہ پنجاب حکومت سیاحوں اور مقامی آبادی کو سہولیات فراہم کرنے کے لیے متحرک ہے اور برف باری کے طوفان سے نمٹنے کے لیے جامع پالیسی تشکیل دی جا رہی ہے۔

صوبائی وزیر نے کہا کہ مری میں 13 ٹورسٹ فیسلیٹیشن سینٹرز مکمل فعال ہیں اور نمک کے بیگز وافر مقدار میں اسٹور رومز میں موجود ہیں۔ اجلاس میں ڈی سی مری، اسسٹنٹ کمشنر، محکمہ ہائی وے اور میکینیکل ونگ کے افسران بھی موجود تھے۔