کراچی میں تیز ہواؤں کے ساتھ بارش،سردی کی شدت میں اضافہ

کراچی کے مختلف علاقوں میں تیز ہواؤں اور گرج چمک کے ساتھ بارش کا سلسلہ شروع ہو گیا ہے جس کے باعث موسم مزید سرد ہو گیا۔ سرجانی ٹاؤن، ملیر، مشرف کالونی اور اطراف میں موسلادھار بارش ریکارڈ کی گئی، جبکہ نارتھ کراچی، ناگن چورنگی، بفرزون اور قریبی علاقوں میں بارش کے بعد سردی میں نمایاں اضافہ دیکھا گیا۔

شہر کے صدر اور ملحقہ علاقوں میں ہلکی بارش جبکہ پی ای سی ایچ ایس میں بوندا باندی ہوئی۔ اسی طرح احسن آباد، گلستان جوہر، ڈالمیا اور اسکیم 33 سے بھی بارش کی اطلاعات موصول ہوئی ہیں۔

محکمہ موسمیات کے مطابق آئندہ 24 گھنٹوں کے دوران کراچی کا مطلع جزوی طور پر ابر آلود رہے گا جبکہ جمعہ سے سردی کی شدت میں مزید اضافے کا امکان ہے۔ محکمہ موسمیات کا کہنا ہے کہ شہر میں کم سے کم درجہ حرارت 7 ڈگری سینٹی گریڈ اور زیادہ سے زیادہ درجہ حرارت 25 ڈگری سینٹی گریڈ تک رہ سکتا ہے۔