ضلع ٹانک کے علاقے جنڈولہ میں پہلی بار برفباری

ٹانک: پاکستان کے بالائی علاقوں میں  بارش اور برفباری کا سلسلہجاری ہے تاہم  خیبر پختونخوا اور بلوچستان میں چند ایسے گرم مرطوب مقامات پر بھی ہلکی برفباری ہوئی ہے جہاں عموماً موسم سرما میں برفباری نہیں ہوتی یا یہ عمل طویل عرصے بعد دیکھنے کو ملا ہے۔

اس غیرمتوقع برفباری سے متاثرہ خیبرپختونخوا کے علاقوں میں جنڈولہ (ضلع ٹانک) اور صدہ (ضلع کرم) شامل ہیں جبکہ بلوچستان میں خاران اور نوشکی جیسے اضلاع کے بعض مقامات پر بھی برسوں بعد برفباری ہوئی ہے۔ ماہرین موسمیات کا کہنا ہے کہ اس غیر متوقع برفباری کی بڑی وجہ موسمیاتی تبدیلی ہے۔

ڈپٹی کمشنر ٹانک نے بی بی سی کو بتایا کہ ’جنڈولہ سب ڈویژن میں برف پڑی ہے، لیکن یہ بہت زیادہ نہیں ہے۔ اس سوال کے جواب میں کہ کیا ان کی اطلاعات کے مطابق ماضی میں اس علاقے میں کبھی برفباری ہوئی؟ ڈپٹی کمشنر ٹانک نے کہا کہ ’مقامی لوگوں کا کہنا ہے کہ اُن کی یادداشت میں ایسی کوئی بات نہیں کہ اِس علاقے میں کبھی برف پڑی ہو۔

دوسری جانب ضلع کرم میں صدہ اور اس کے قرب و جوار کے علاقوں میں بھی برفباری ہوئی ہے۔ صدہ ہسپتال میں موجود ڈاکٹر رحیم نے دعویٰ کیا کہ اس علاقے میں آخری برفباری 2016 کے موسم سرما میں ہوئی تھی۔ ’2019 میں بھی تھوڑی سے برف پڑی لیکن کل رات سے یہاں کافی برفباری ہوئی ہے۔‘