ڈیرہ اسماعیل خان،خودکش دھماکہ میں جاں بحق افرادکی تعداد 6 ہو گئی

ڈیرہ اسماعیل خان میں سربراہ امن کمیٹی کے گھر شادی کی تقریب کے دوران خودکش دھماکہ میں جاں بحق ہونے والوں کی تعداد 6 ہو گئی ہے۔ گورنر خیبرپختونخوا فیصل کریم کنڈی نے واقعے کی تفصیلی رپورٹ طلب کر لی ہے۔

قریشی موڑ کے قریب پیش آنے والے اس دھماکے میں جنوبی وزیرستان ٹھیکیدار یونین کے صدر نور حسن محسود کے گھر 6 افراد جاں بحق جبکہ 10 افراد زخمی ہوئے۔ جاں بحق افراد میں ایڈووکیٹ عبدالمجید لاگری محسود، وحید جگری، رحمان اللہ، شہزاد، عنایت اللہ اور چھوٹا وحید شامل ہیں۔

گورنر نے دھماکے کے زخمیوں کو فوری اور ہر ممکن طبی امداد فراہم کرنے کی ہدایت کی ہے اور اعلیٰ حکام سے واقعے کی تحقیقات اور رپورٹ فوری پیش کرنے کو کہا ہے۔

پولیس نے شواہد اکٹھے کر لیے ہیں اور زخمیوں کے بیانات قلمبند کیے جا رہے ہیں، جبکہ تحقیقات کا دائرہ بھی وسیع کیا جا رہا ہے۔