سابق ڈی جی آئی ایس آئی فیض حمید کے بھائی کو بڑا ریلیف،گرفتاری معطل

 اسلام آباد: سابق ڈی جی آئی ایس آئی فیض حمید کے بھائی نجف حمید کو فراڈ کیس میں بڑا ریلیف مل گیا ہے، اور عدالت نے ان کی گرفتاری روک دی ہے۔

اسلام آباد ہائیکورٹ نے نجف حمید کی درخواست پر کارروائی کو آئندہ سماعت تک معطل کرتے ہوئے اسپیشل جج سینٹرل کے فیصلے پر مؤقف اختیار کیا۔ عدالت نے متعلقہ فریقین کو نوٹس جاری کر کے جواب طلب کر لیا ہے اور کیس کی سماعت ملتوی کر دی گئی ہے۔

واضح رہے کہ اسپیشل جج سینٹرل نے 16 جنوری کو نجف حمید کی قبل از گرفتاری ضمانت واپس لینے کے لیے ایف آئی اے کی درخواست منظور کی تھی، جس کے خلاف نجف حمید نے اسلام آباد ہائیکورٹ سے رجوع کیا۔ وہ اسپیشل جج کے 24 جنوری کے فیصلے کو چیلنج کر رہے تھے۔

گزشتہ سماعت میں جسٹس راجا انعام امین منہاس کے روبرو نجف حمید کی درخواست پر نوٹس جاری کیے گئے تھے، جس کے بعد عدالت نے انہیں فوری گرفتاری سے بھی روک دیا ہے۔