پی ٹی آئی کی غیر ملکی فنڈنگ کیس میں مزید 2 ملزمان شامل
اسلام آباد: وفاقی تحقیقاتی ادارے (FIA) نے پاکستان تحریک انصاف (PTI) کے بانی عمران خان اور دیگر کے خلاف ممنوعہ فنڈنگ کیس میں چارج شیٹ پر نظر ثانی کرنے کا فیصلہ کیا ہے۔ یہ پیش رفت کیس میں دو نئے ملزمان کی شمولیت کے بعد سامنے آئی ہے۔
جمعہ کے روز اسلام آباد کی بینکنگ عدالت کے جج عبدالغفور کاکڑ نے کیس کی سماعت کی۔ پراسیکیوشن کی جانب سے سپیشل پراسیکیوٹر واثق ملک عدالت میں پیش ہوئے اور بتایا کہ کیس میں پی ٹی آئی کے چیف فنانس آفیسر سراج احمد اور نجی بینک کے ملازم فیصل قاضی کو نئے ملزمان کے طور پر شامل کیا گیا ہے۔
اسپیشل پراسیکیوٹر نے عدالت کو آگاہ کیا کہ پہلے جزوی چارج شیٹ جمع کرائی گئی تھی، لیکن اب دو نئے ملزمان کے اضافے کے بعد ضمنی چالان کے بجائے مکمل چارج شیٹ جمع کرائی جائے گی۔
عدالت کے استفسار پر پراسیکیوشن نے 10 سے 15 دن کی مہلت مانگی، جس پر جج نے 5 مارچ تک مکمل چارج شیٹ جمع کرانے کا حکم دیا۔
عدالت نے نئے نامزد ملزمان سراج احمد اور فیصل قاضی کی عبوری ضمانت بھی 5 مارچ تک منظور کر لی ہے۔
کیس کا پس منظر:
الیکشن کمیشن آف پاکستان نے اگست 2022 میں ممنوعہ فنڈنگ کیس کا فیصلہ سناتے ہوئے کہا تھا کہ تحریک انصاف نے جان بوجھ کر عارف نقوی کی کمپنی ‘ووڈن کرکٹ لمیٹڈ’ سے 21.2 لاکھ ڈالر وصول کیے۔ اس کے علاوہ برطانیہ، متحدہ عرب امارات اور امریکہ کی مختلف کمپنیوں سے حاصل کردہ فنڈز کو بھی پاکستانی قوانین کی خلاف ورزی قرار دیا گیا تھا۔
تحریک انصاف ان الزامات کی تردید کرتی آئی ہے۔ پارٹی کا موقف ہے کہ یہ فنڈز بیرون ملک مقیم پاکستانیوں کے عطیات تھے جنہیں غیر قانونی قرار نہیں دیا جا سکتا۔کیس کی مزید سماعت اب 5 مارچ کو ہوگی۔