کیا شدید غصہ فالج کا سبب بن سکتا ہے؟

32 ممالک میں تقریباً 13 ہزار Stroke (فالج) کے مریضوں پر کی گئی ایک بین الاقوامی تحقیق میں ایک اہم انکشاف سامنے آیا۔ مریضوں سے پوچھا گیا کہ فالج کے حملے سے ٹھیک پہلے کیا ہو رہا تھا۔ ہر 10 میں سے ایک مریض نے بتایا کہ حملے سے پہلے وہ شدید غصے یا جذباتی تناؤ میں تھا۔

ماہرین کے مطابق جب انسان کو شدید غصہ آتا ہے تو دماغ فوراً خطرے کا سگنل جاری کرتا ہے۔ جسم میں ایڈرینالین خارج ہوتی ہے، دل کی دھڑکن تیز ہو جاتی ہے اور بلڈ پریشر اچانک بڑھ جاتا ہے۔ اگر دماغ کی کوئی رگ پہلے سے کمزور ہو تو یہ اضافی دباؤ اسے برداشت نہیں کرنے دیتا۔ ایسی صورت میں رگ پھٹ سکتی ہے یا خون کی روانی متاثر ہو سکتی ہے، جو فالج کا سبب بن سکتا ہے۔ بعض کیسز میں یہ سارا عمل صرف 90 سیکنڈ کے اندر پیش آ سکتا ہے۔

طبی ماہرین کا کہنا ہے کہ اگرچہ ہر غصہ فالج کا باعث نہیں بنتا، لیکن شدید اور اچانک جذباتی تناؤ خاص طور پر ہائی بلڈ پریشر یا دل کے مریضوں کے لیے خطرناک ہو سکتا ہے۔ اسی لیے ماہرین مشورہ دیتے ہیں کہ جب بھی شدید غصہ آئے تو کم از کم 90 سیکنڈ کے لیے خود کو پرسکون کرنے کی کوشش کریں، گہری سانس لیں اور ردعمل دینے سے پہلے توقف کریں۔ یہ چند لمحے آپ کے دماغ اور جسم دونوں کو بڑے نقصان سے بچا سکتے ہیں۔