آپریشن غضب الحق جاری: پاک فضائیہ کی افغانستان میں بڑی کارروائی، دہشت گردوں کے ٹھکانے تباہ

راولپنڈی/اسلام آباد: دہشت گردی کے خلاف جاری فیصلہ کن معرکے ‘آپریشن غضب الحق’ کے تحت پاک افواج نے سرحد پار افغانستان میں فتنہ الخوارج اور ان کے سہولت کاروں کے خلاف بڑی کامیابی حاصل کی ہے۔ سیکیورٹی ذرائع کے مطابق، 12 اور 13 مارچ کی درمیانی شب پاک فضائیہ نے دہشت گردوں کے اہم ٹھکانوں اور فوجی تنصیبات کو نشانہ بناتے ہوئے کامیاب فضائی حملے کیے، جس کی ویڈیو بھی جاری کر دی گئی ہے۔

آپریشن غضب للحق میں پاک فوج کے افغانستان میں ایک اور کامیاب فضائی حملے کی ویڈیو جاری کردی گئی جس میں کابل میں 313 کور کا ایمونیشن ڈمپ موثر انداز میں تباہ کردیا گیا اور کسی سول آبادی کو نقصان نہیں پہنچایا گیا۔

سیکیورٹی ذرائع کے مطابق ان حملوں میں پاک افواج نے کابل میں 313 کور کے ایمونیشن ڈمپ کو بھی موثر انداز میں تباہ کیا، اس ایمونیشن ڈمپ سے افغان طالبان سمیت دہشت گرد تنظیمیں اسلحہ و بارود استعمال کر رہی تھیں۔

سیکیورٹی ذرائع کے مطابق جاری کی گئی ویڈیو میں دیکھا جاسکتا ہے کہ پاک افواج کی جانب سے صرف ایمونیشن ڈمپ کو نشانہ بنا کر تباہ کیا گیا۔

یہ ویڈیو افغان اور بھارتی میڈیا کے اس پروپیگنڈے کو رد کرتی ہے کہ پاک فوج کی جانب سے افغانستان میں سول آبادی کو نشانہ بنایا جا رہا ہے۔

 پاک افواج نے قندھار کے علاقے تراوو (Tarawo) میں قائم دہشت گردوں کے اہم کیمپ کو موثر انداز میں نشانہ بنا کر مکمل طور پر تباہ کر دیا۔

صوبہ پکتیا کے علاقے شیرِ ناؤ میں واقع دہشت گرد کیمپ پر بھی شدید بمباری کی گئی، جس میں دہشت گردوں کے ڈھانچے کو شدید نقصان پہنچا ہے۔

ذرائع کے مطابق ان حملوں میں نہ صرف فتنہ الخوارج کے ٹھکانے بلکہ دہشت گردوں کے زیرِ استعمال فوجی تنصیبات کو بھی نشانہ بنایا گیا ہے۔ آپریشن کے دوران جدید ٹیکنالوجی کا استعمال کرتے ہوئے اس بات کو یقینی بنایا گیا کہ اہداف کو درست طریقے سے ہٹ کیا جائے۔

سیکیورٹی حکام نے واضح پیغام دیا ہے کہ آپریشن غضب الحق کے تحت کی جانے والی یہ کارروائیاں محض آغاز ہیں۔ پاکستان کی سلامتی پر سمجھوتہ نہیں کیا جائے گا اور جب تک دہشت گردی کا مکمل خاتمہ اور تمام متعین کردہ اہداف حاصل نہیں ہو جاتے، یہ آپریشن پوری شدت کے ساتھ جاری رہے گا۔