پشین میں رشتے کے تنازع پر فائرنگ، خاتون سمیت 3 افراد جاں بحق

کوئٹہ:  بلوچستان کے ضلع پشین کے نواحی علاقے یارو میں رشتے کے تنازع پر مسلح افراد نے ایک گھر پر بے دریغ فائرنگ کی، جس کے نتیجے میں ایک خاتون سمیت 3 افراد جاں بحق ہوگئے جبکہ گھر کی ایک اور خاتون شدید زخمی ہوگئی۔

ملزمان نے رشتے کے تنازع کی بنیاد پر محمد نسیم، ان کی بیٹی مسمات (س) اور ان کے بھتیجے شہریار کو نشانہ بنایا۔ مسلح حملہ آوروں نے گھر میں گھس کر فائرنگ شروع کر دی جس کے نتیجے میں محمد نسیم اور ان کا بھتیجا شہریار موقع پر ہی جاں بحق ہوگیا۔

بیٹی مسمات (س) بھی زخموں کی تاب نہ لا سکی جبکہ اہلیہ مسمات (م) شدید زخمی ہوئیں، جنہیں فوری طور پر ڈسٹرکٹ ٹیچنگ اسپتال پشین منتقل کیا گیا۔ ملزمان حملے کے فوراً بعد فرار ہونے میں کامیاب ہوگئے۔

واقعے کی اطلاع ملتے ہی تھانہ یارو کے ایس ایچ او اور پولیس کی ٹیم موقع پر پہنچی، مقتولین کی لاشیں اور زخمی خاتون کو اسپتال پہنچایا گیا، جہاں ڈاکٹروں نے تینوں افراد کو مردہ قرار دے دیا۔ پشین پولیس نے فوری طور پر تفتیش شروع کر دی ہے اور ملزمان کی گرفتاری کے لیے چھاپے مارے جا رہے ہیں۔