کراچی میں انمول پنکی کے باتھ رو سے 65 لاکھ روپے کی کوکین برآمد
نشاندہی کرانے فلیٹ پر لے کر گئی، 228 گرام تین تھیلیوں میں چھپا کر رکھی گئی تھی
کراچی میں ساؤتھ پولیس نے گرفتار ملزمہ انمول عرف پنکی کی نشاندہی پر کارروائی کرتے ہوئے اس کے فلیٹ کے باتھ روم سے 65 لاکھ روپے سے زائد مالیت کی کوکین برآمد کر لی جبکہ ملزمہ کے خلاف منشیات ایکٹ کے تحت مقدمہ درج کر لیا گیا ہے۔
پولیس حکام کے مطابق سچل تھانے میں تفتیشی افسر مثل خان کی مدعیت میں مقدمہ درج کیا گیا ہے۔ مقدمے کے متن میں کہا گیا ہے کہ گرفتار ملزمہ انمول عرف پنکی نے دورانِ تفتیش انکشاف کیا تھا کہ وہ کوکین اور دیگر منشیات برآمد کروا سکتی ہے اور اس نے اپنے ذاتی فلیٹ میں منشیات چھپا رکھی ہے۔
پولیس ٹیم ملزمہ کی نشاندہی پر متعلقہ فلیٹ پہنچی جہاں ملزمہ نے پولیس موبائل کو کمپلیکس کے اندر رکوایا اور اہلکاروں کو اپنے فلیٹ تک لے گئی۔ پولیس کے مطابق فلیٹ پر تالا لگا ہوا تھا جسے کانسٹیبل نے توڑا، جس کے بعد ٹیم اندر داخل ہوئی۔
پولیس حکام کا کہنا ہے کہ ملزمہ سیدھی اہلکاروں کو باتھ روم میں لے گئی جہاں تلاشی کے دوران پلاسٹک کی مختلف تھیلیوں میں چھپائی گئی کوکین برآمد ہوئی۔ پولیس ریکارڈ کے مطابق تین تھیلیوں سے مجموعی طور پر 228 گرام کوکین برآمد کی گئی جبکہ وہاں سے منشیات کی سات خالی ڈبیاں بھی ملی ہیں۔
پولیس کے مطابق برآمد ہونے والی کوکین کی مالیت 65 لاکھ روپے سے زائد بنتی ہے۔ ملزمہ انمول عرف پنکی نے دورانِ تفتیش تسلیم کیا کہ برآمد ہونے والی منشیات اسی کی ملکیت ہے، جس کے بعد اس کے خلاف قانونی کارروائی کا آغاز کر دیا گیا ہے۔