آزاد کشمیر صورتحال پر بلاول بھٹو کا آج ہنگامی اجلاس طلب

پاکستان پیپلز پارٹی کے چیئرمین بلاول بھٹو زرداری نے آزاد جموں و کشمیر کی مجموعی سیاسی و امن و امان کی صورتحال پر شدید تحفظات کا اظہار کرتے ہوئے پارٹی کا ہنگامی اجلاس طلب کر لیا۔
اجلاس زرداری ہاؤس، اسلام آباد میں منعقد کیا جا رہا ہے۔
اجلاس میں آزاد کشمیر کے وزیر اعظم، پی پی پی کی پارلیمانی پارٹی کے ارکان اور پارٹی کے مرکزی رہنما شریک ہوں گے۔
خطے کی موجودہ سیاسی صورتحال، جوائنٹ عوامی ایکشن کمیٹی کے احتجاج اور حکومتی اقدامات کے بعد پیدا ہونے والے تنازعات، اور آئندہ انتخابات جیسے معاملات پر غور کیا جائے گا۔
آزاد کشمیر میں جوائنٹ عوامی ایکشن کمیٹی کی جانب سے احتجاج کی کال اور حکومت کی جانب سے امن و امان برقرار رکھنے کے لیے کیے جانے والے سخت اقدامات کے تناظر میں یہ اجلاس انتہائی اہمیت کا حامل ہے۔ پی پی پی ذرائع کے مطابق، بلاول بھٹو زرداری موجودہ انتظامی کارکردگی سے ناخوش ہیں اور خطے میں استحکام لانے کے لیے اہم سیاسی فیصلے متوقع ہیں۔