کالعدم عوامی ایکشن کمیٹی کے رہنما کو گرفتار کرنے کی کوشش،جھڑپ،ایک جاں بحق

پاکستان کے زیر انتظام کشمیر کے شہر راولاکوٹ میں کالعدم قرار دی گئی جموں و کشمیر جوائنٹ عوامی ایکشن کمیٹی کے رہنما کو گرفتار کرنے کی کوشش کے دوران سیکیورٹی فورسز اور مظاہرین کے درمیان جھڑپ ہوئی، جس کے نتیجے میں ایک شخص  جاں بحق ہو گیا ہے۔

مقامی انتظامیہ کے مطابق یہ واقعہ اس وقت پیش آیا جب لانگ مارچ کے شرکا کو مظفرآباد کی جانب پیش قدمی سے روکنے کی کوشش کی گئی۔ حکام کا کہنا ہے کہ سیکیورٹی فورسز نے علاقے میں کنٹرول برقرار رکھنے کے لیے کارروائی کی، تاہم اس دوران شدید مزاحمت دیکھنے میں آئی۔

انتظامیہ کے مطابق جھڑپ کے بعد علاقے میں صورتحال مزید کشیدہ ہو گئی ہے جبکہ سیکیورٹی اداروں نے مختلف مقامات پر گشت بڑھا دیا ہے۔ رہائشیوں کو گھروں تک محدود رہنے کی ہدایت بھی جاری کی گئی ہے۔

دوسری جانب مقامی سطح پر جاری لانگ مارچ کے شرکا کی بڑی تعداد راولاکوٹ کے اطراف موجود ہے اور وہ مظفرآباد کی جانب پیش قدمی کے لیے پرعزم ہیں۔ انتظامیہ نے واضح کیا ہے کہ مظاہرین کو آگے بڑھنے کی اجازت نہیں دی جائے گی۔

پچھلے چند روز سے علاقے میں احتجاج اور ہڑتال کے باعث معمولات زندگی شدید متاثر ہیں۔ مختلف اضلاع میں کاروباری مراکز، ٹرانسپورٹ، بینک اور پیٹرول پمپس بند ہیں جبکہ سڑکوں پر ٹریفک نہ ہونے کے برابر ہے۔

حکام کے مطابق سیکیورٹی صورتحال کو قابو میں رکھنے کے لیے اضافی نفری تعینات کر دی گئی ہے اور حساس علاقوں میں نگرانی مزید سخت کر دی گئی ہے۔