شیخ بانڈہ میں سکیورٹی فورسز کی کارروائی،دو دہشت گرد ہلاک،ایک افغانی نکلا
ہلاک افراد کے قبضے سے اسلحہ، خودکش جیکٹ، غیر ملکی کرنسی اور شناختی دستاویزات برآمد ہوئیں۔
مہمند کے پہاڑی علاقے شیخ بانڈہ میں سکیورٹی فورسز کی کارروائی کے دوران دو مبینہ دہشت گرد ہلاک کر دیے گئے۔ سکیورٹی ذرائع کے مطابق ہلاک ہونے والوں میں ایک غیر ملکی شہری بھی شامل ہے جس کی شناخت افغان شہری عمر بلال کے نام سے کی گئی ہے۔
ذرائع کا کہنا ہے کہ کارروائی 4 جون 2026 کو کی گئی، جس کے دوران ہلاک افراد کے قبضے سے اسلحہ، خودکش جیکٹ، غیر ملکی کرنسی اور شناختی دستاویزات برآمد ہوئیں۔
سکیورٹی حکام کے مطابق برآمد ہونے والی دستاویزات میں افغان شناختی کارڈ بھی شامل ہے، جس کی بنیاد پر غیر ملکی شہری کی شناخت کی گئی۔
مہمند کے علاقے شیخ بانڈہ میں سیکیورٹی فورسز کی کامیاب کارروائی، دو دہشتگرد ہلاک، ایک افغان شہری شامل
پاکستان میں دہشتگردی کے پیچھے فتنہ الخوارج اور افغانستان کے درمیان روابط کے مزید شواہد سامنے آگئے
سیکیورٹی فورسز کی مہمند کے پہاڑی علاقے شیخ بانڈہ میں کامیاب کارروائی کے دوران… pic.twitter.com/QuX0Nwzk6l
— The 7th Bureau (@7thBureau_) June 11, 2026
دفاعی امور کے ماہرین کا کہنا ہے کہ ایسے واقعات سرحد پار دہشت گردی سے متعلق خدشات کو مزید تقویت دیتے ہیں۔ پاکستان اس سے قبل بھی بین الاقوامی سطح پر یہ مؤقف اختیار کرتا رہا ہے کہ دہشت گرد عناصر افغان سرزمین استعمال کر کے پاکستان میں کارروائیاں کرتے ہیں۔
سکیورٹی فورسز کا کہنا ہے کہ ملک میں دہشت گردی کے خاتمے اور امن و استحکام کے قیام کے لیے آپریشنز اور انٹیلی جنس بنیادوں پر کارروائیاں جاری رہیں گی۔