پارلیمنٹ کو ویگو ڈالوں سے بچائیں، یہ بے ہودگی ہے، خواجہ آصف کی دہائی

اسلام آباد: وزیر دفاع خواجہ آصف نے کہاہے کہ پارلیمنٹ کو ویگو ڈالوں سے بچائیں، یہ بے ہودگی ہے۔

خواجہ آصف نے قومی اسمبلی میں اظہار خیال کرتے ہوئے عوامی نمائندوں اور وزرا کے طرزِ عمل پر سخت تنقید کی اور سکیورٹی پروٹوکول میں استعمال ہونے والی گاڑیوں اور اندازِ سیاست پر نظرثانی کا مطالبہ کیا ہے۔

پارلیمنٹ میں خطاب کے دوران خواجہ آصف نے کہا کہ عوامی نمائندوں کو اپنے رویے اور سیکیورٹی کلچر میں سادگی اپنانی چاہیے، کیونکہ ان کے اقدامات عوام میں براہِ راست مثال بنتے ہیں۔

انہوں نے کہا کہ عوام اپنے منتخب نمائندوں کے کردار اور رویوں کو مثال کے طور پر دیکھتے ہیں۔ اس لیے ان کا طرز عمل معاشرے پر براہ راست اثر انداز ہوتا ہے۔

ویگو ڈالوں سے پارلیمنٹ کو بچائیں، یہ بے حیائی ہے، خواجہ آصف کا پارلیمنٹ میں خطاب
A fiery moment in the National Assembly! Khawaja Asif makes a bold demand: "Save the Parliament from Vigo Dalas."#KhawajaAsif #VigoDala #PakistanPolitics #NationalAssembly pic.twitter.com/7VLkezoPLV

— Daily Ummat (@ummatdigitalpk) June 21, 2026

خواجہ آصف نے وزرا اور ارکانِ پارلیمنٹ کے لیے بھاری سیکیورٹی قافلوں اور ویگو ڈالوں کے استعمال کو غیر ضروری قرار دیتے ہوئے کہا کہ اسے اکثر طاقت کے مظاہرے کے طور پر دیکھا جاتا ہے۔ جس سے عوام میں منفی تاثر پیدا ہوتا ہے۔

انہوں نے ارکان پارلیمنٹ کو یاد دلایا کہ اقتدار اور اختیار عوام کی امانت ہیں، اس لیے عوامی نمائندوں کو اپنے رویوں اور طرز زندگی سے مثبت مثال قائم کرنی چاہیے۔

انہوں نے کہا کہ پارلیمنٹ میں بیٹھے ارکان کو یہ یاد رکھنا چاہیے کہ انہیں عزت اور اختیار عوام کی طرف سے دیا گیا ہے، اور ان کے طرزِ عمل کو لوگ دیکھتے اور اس کی تقلید کرتے ہیں۔

خواجہ آصف نے کہا کہ جب کوئی شخص اقتدار میں ہوتا ہے تو پولیس آگے ہوتی ہے اور جب اقتدار میں نہیں ہوتا تو تو پولیس پیچھے ہوتی ہے، اس لیے رویوں میں توازن اور شائستگی ضروری ہے۔

انہوں نے ویگو کلچر اور ضرورت سے زائد سیکیورٹی پروٹوکول پر ازسرنو غور کرنے کا مطالبہ کرتے ہوئے کہا کہ عوامی نمائندوں کو غیر ضروری پروٹوکول سے گریز کرنا چاہیے تاکہ عوام تک مثبت پیغام پہنچ سکے۔