کراچی:ڈاکٹر آکاش کے 2 مبینہ قاتل “رام چند” اور “ساگر” جامشورو ٹول پلازہ سے گرفتار

کراچی میں ڈاکٹر آکاش کمار کے قتل کیس میں پولیس نے اہم پیش رفت کرتے ہوئے دو مبینہ ملزمان کو گرفتار کرنے کا دعویٰ کیا ہے۔

پولیس کے مطابق دونوں افراد کو جامشورو ٹول پلازہ کے قریب کارروائی کے دوران حراست میں لیا گیا۔ گرفتار ملزمان کی شناخت رام چند اور ساگر کمار کے نام سے ہوئی ہے، جن کا تعلق بالترتیب دہرکی اور سکھر سے بتایا جا رہا ہے۔

حکام کا کہنا ہے کہ ملزمان سے مختلف پہلوؤں پر تفتیش جاری ہے، جس میں یہ جاننے کی کوشش کی جا رہی ہے کہ واردات کے پسِ پردہ محرکات کیا تھے اور آیا یہ قتل کسی کے کہنے پر کیا گیا۔

پولیس کے مطابق کیس کی مزید تحقیقات جاری ہیں اور شواہد کی روشنی میں آئندہ قانونی کارروائی عمل میں لائی جائے گی۔