آزاد کشمیر میں حکومت سازی،ن لیگ اور پیپلز پارٹی کا تیسرا مذاکراتی دور مکمل

آزاد جموں و کشمیر میں حکومت سازی اور آئندہ کی سیاسی حکمت عملی پر پاکستان مسلم لیگ (ن) اور پاکستان پیپلز پارٹی کے درمیان جاری مشاورتی عمل کا تیسرا دور مکمل ہوگیا، تاہم تاحال کسی حتمی فیصلے یا مشترکہ اعلامیے کا اعلان نہیں کیا گیا۔

ذرائع کے مطابق دونوں جماعتوں کے رہنماؤں نے ایک نجی ہوٹل میں ملاقات کے دوران انتخابات کے بعد کی سیاسی صورتحال، ممکنہ حکومت سازی، آئندہ تعاون اور مختلف سیاسی امور پر تبادلہ خیال کیا۔

ذرائع کا کہنا ہے کہ اجلاس میں میرپور ڈویژن کے انتخابات سے متعلق بعض تحفظات بھی زیر بحث آئے۔ دونوں جماعتوں نے اس بات پر اتفاق کیا کہ انتخابی عمل کے دوران کارکنوں کو تحمل اور ذمہ داری کا مظاہرہ کرنے کی ہدایت دی جائے تاکہ پرامن ماحول برقرار رہے۔

مذاکرات میں پیپلز پارٹی کی جانب سے قمر زمان کائرہ، نیئر حسین بخاری، ندیم افضل چن اور وزیراعظم آزاد کشمیر فیصل ممتاز راٹھور شریک ہوئے، جبکہ مسلم لیگ (ن) کی نمائندگی رانا ثناء اللہ، امیر مقام، طارق فاروق اور دیگر رہنماؤں نے کی۔

ذرائع کے مطابق دونوں جماعتوں کے درمیان حالیہ دنوں میں مختلف مراحل میں ہونے والی ملاقاتوں کا مقصد انتخابات کے بعد پیدا ہونے والی سیاسی صورتحال کا جائزہ لینا اور ممکنہ تعاون کے امکانات پر غور کرنا ہے۔

اب تک مذاکرات کے نتائج یا کسی ممکنہ سیاسی فارمولے سے متعلق دونوں جماعتوں کی جانب سے کوئی باضابطہ اعلان سامنے نہیں آیا۔

واضح رہے کہ آزاد کشمیر کے عام انتخابات مرحلہ وار جاری ہیں۔ پہلے مرحلے میں میرپور ڈویژن کی نشستوں پر پولنگ مکمل ہو چکی ہے، جبکہ دوسرے مرحلے میں مظفرآباد ڈویژن اور پاکستان میں مقیم مہاجرین کی نشستوں پر ووٹنگ جاری ہے۔ تیسرے مرحلے میں راولاکوٹ ڈویژن کی نشستوں پر پولنگ 10 اگست کو ہوگی۔

سیاسی تجزیہ کاروں کے مطابق آئندہ انتخابی نتائج حکومت سازی کے عمل میں اہم کردار ادا کریں گے، اور اگر کسی جماعت کو واضح اکثریت حاصل نہ ہوئی تو دونوں بڑی جماعتوں کے درمیان جاری مشاورت مستقبل کی سیاسی ترتیب پر اثر انداز ہو سکتی ہے۔