میر رضا قتل کیس،دوبارہ مک مکا روکنے کے لیے پہرہ دینا ہوگا،خواجہ آصف

اسلام آباد: وزیر دفاع خواجہ آصف نے میر رضا قتل کیس کی تحقیقات اور سامنے آنے والے شواہد پر بات کرتے ہوئے کہا ہے کہ معاملے میں مبینہ طور پر پردہ ڈالنے کی کوششوں سے یہ تاثر ملتا ہے کہ پورا نظام متاثر تھا۔

سماجی رابطے کی ویب سائٹ ایکس پر ایک ٹی وی پروگرام کے کلپ پر ردعمل دیتے ہوئے خواجہ آصف نے کہا کہ کیس کو مسلسل اجاگر کیے جانے کے باعث اس کے نتائج سامنے آ رہے ہیں اور مختلف حقائق بھی منظر عام پر آ رہے ہیں۔

وزیر دفاع کے مطابق کیس میں جس انداز سے مبینہ کور اپ کے شواہد سامنے آ رہے ہیں، اس سے معلوم ہوتا ہے کہ معاملے میں نظام کی سطح پر بھی مسائل موجود تھے۔

خواجہ آصف نے خبردار کیا کہ کیس میں دوبارہ کسی قسم کے سمجھوتے یا معاملہ دبانے کی کوشش کو روکنے کے لیے مسلسل نگرانی ضروری ہے۔ ان کا کہنا تھا کہ ماضی میں اگر کسی سطح پر مک مکا ہوا تھا تو مستقبل میں بھی ایسی صورتحال پیدا ہو سکتی ہے۔

انہوں نے کہا کہ جن افراد پر کیس میں حقائق چھپانے یا معاملے پر پردہ ڈالنے کا الزام سامنے آ رہا ہے، ان کے کردار کو بھی واضح کیا جانا چاہیے اور ذمہ دار عناصر کو بے نقاب کیا جانا ضروری ہے۔

وزیر دفاع نے اس بات پر زور دیا کہ میر رضا قتل کیس میں سامنے آنے والے حقائق کی مکمل اور شفاف تحقیقات ہونی چاہئیں تاکہ کسی بھی مبینہ کور اپ یا غفلت میں ملوث افراد کا تعین کیا جا سکے۔