آسٹریا نے ایران کے محمد اسلامی کو ویانا آنے سے روک دیا

واشنگٹن: امریکی وزیر توانائی کرس رائٹ نے ایران کی جوہری توانائی تنظیم کے سربراہ محمد اسلامی کی ویانا میں عالمی جوہری توانائی ایجنسی (آئی اے ای اے) کی 70ویں سالانہ جنرل کانفرنس میں عدم شرکت سے متعلق ایک حالیہ بیان میں کہا ہے کہ ’محمد اسلامی کا نام پابندیوں کے شکار افراد کی فہرست میں ہے اس لیے انھیں اس کانفرنس میں شامل ہونے کی اجازت نہیں دی جا سکتی۔‘

کرس رائٹ کے مطابق محمد اسلامی نے پابندیوں سے استثنیٰ حاصل کرنے کی درخواست کی تھی، تاہم یہ درخواست مسترد کر دی گئی۔

ایران نے آج مؤقف اختیار کیا کہ آسٹریا نے امریکی دباؤ کے باعث محمد اسلامی کو ویانا میں داخلے کی اجازت نہیں دی، جس کے نتیجے میں وہ آئی اے ای اے کے اجلاس میں شرکت نہ کر سکے۔

کرس رائٹ کے بیان کے بعد ویانا میں ایران کے سفیر اور آئی اے ای اے میں ایرانی نمائندے رضا نجفی نے اس اقدام کو ’تخریب کاری‘ قرار دیتے ہوئے آسٹریا کو شدید تنقید کا نشانہ بنایا۔

رضا نجفی نے کہا کہ ’ویانا میں قائم بین الاقوامی اداروں کے میزبان ملک کی حیثیت سے اپنی ذمہ داریاں پوری کرنے میں آسٹریا کی حکومت کی پالیسیوں اور کارکردگی کا ناقابلِ قبول ریکارڈ موجود ہے، جس کے باعث یہ واضح ہے کہ آسٹریا اس منصب کے لیے موزوں نہیں۔‘

ایرانی میڈیا کے مطابق آسٹریا نے محمد اسلامی کے لیے استثنیٰ کی درخواست اقوام متحدہ کی سلامتی کونسل کی پابندیوں سے متعلق کمیٹی کو بھیجی تھی، تاہم یہ درخواست مسترد کر دی گئی۔

آسٹریا کے مؤقف پر ردعمل دیتے ہوئے ایرانی سفیر رضا نجفی نے کہا کہ ’یہ حیران کن ہے کہ آسٹریا کسی ایسی قرارداد یا کمیٹی کا حوالہ دے کر اپنے اقدام کا جواز پیش کرے جو اب مؤثر نہیں رہی یا جس کا وجود ہی نہیں۔‘