جھنگ روڈ پر ٹریفک حادثہ، 8 افراد جاں بحق

سرگودھا: جھنگ روڈ پر مسافر بس اور ٹرک میں تصادم سے 8 افراد جاں بحق جبکہ 26 زخمی ہوگئے۔
تفصیلات کے مطابق ٹریفک حادثہ صبح سحری کے وقت پیش آیا جب منڈی بہائوالدین سے ملتان جانے والی بس جھنگ روڈ پر 88 چک کے قریب پہنچی تو مخالف سمت سے آنے والے ٹرک سے ٹکرا گئی۔
حادثے کی اطلاع ملنے پر ریسکیو کا عملہ جائے حادثہ پر پہنچ گیا اور امدادی کارروائی شروع کردی۔
ریسکیو ذرائع کے مطابق حادثے میں بس کے نیچے دب کر 4 افراد موقع پر ہی جاں بحق ہوگئے۔ جاں بحق افراد میں محمد بخش، سجاد، عامر اور عمران شامل ہیں جبکہ ریسکیو عملے نے 26 زخمیوں کو ڈی ایچ کیو اسپتال منتقل کردیا۔
ذرائع کے مطابق اسپتال منتقل کئے جانے والے زخمیوں میں سے3 افراد ہاشم، فیاض اور ظہیر اسپتال پہنچ کر دم توڑ گئے۔ایک شخص کی لاش جائے حادثہ کے قریب سیم نالہ سے ملی۔
پولیس کے مطابق زیادہ تر زخمیوں کا تعلق جھنگ اور ملتان سے ہے، پولیس کا کہنا ہے کہ ابتدائی تفتیش کے مطابق ٹرک ڈرائیور کو اونگھ آ جانے کے باعث حادثہ پیش آیا۔