شیخ رشید کاانتخابات میں سب سے زیادہ ووٹ لینے کادعویٰ

راولپنڈی:عوامی مسلم لیگ کے سربراہ شیخ رشید احمد نے کہا ہے کہ شہباز شریف مکار اور شاطر شخص ہیں جو وکٹ کے دونوں جانب کھیلتے ہیں،میں ہمیشہ پاکستان کے لئے سیاست کرتا ہوں اور اپنی مفاد کو سیاست میں آڑے آنے نہیں دیتا،انتخابی مہم پر 10 لاکھ روپے خرچ کر چکا ہوں، میرادل گواہی دے رہا ہے کہ اس دفعہ سب سے زیادہ ووٹ لوں گا ،کوشش ہے کہ عمران خان کے ساتھ حکومت بنائیں گے ،شریف خاندان کا کوئی سیاسی مستقبل نہیں، پنڈی میں سٹہ چل رہا ہے کہ الیکشن ہوں گے یا نہیں؟نواز شریف مریم نواز کو سیاست میں لے کر آئے ۔ شیخ رشید احمد نے کہا کہ دونوں حلقوں سے ان شاء اللہ قلم اور دوات کو ووٹ ملے گا ،انتخابی مہم کا پہلا جلسہ آج کر رہے ہیں ہمارے تمام پوسٹرز اور بینرز ہٹا دے ہیں، لوگوں کے گھروں سے بھی پینافلیکس ہٹائے جا رہے ہیں، انتخابی مہم پر 10 لاکھ روپے خرچ کر چکا ہوں۔ انہوں نے مزید کہا ہے کہ الیکشن میں ٹکٹ اس کو دیا جاتا ہے جو امیر ہو، جس کے پاس پیسہ ہو ،میرے حلقہ بھی پرانا ہے ،میرے ووٹر بھی پرانے ہیں، میں اپنے حلقے میں وہی سیاسی گہما گہمی دیکھ رہا ہوں جو پہلے الیکشن میں ہوتی تھی۔