کیپٹن (ر) صفدر کو اڈیالہ جیل منتقل کردیا گیا

اسلام آباد: ایون فیلڈ ریفرنس میں گرفتار مسلم لیگ (ن) کے مرکزی رہنماکیپٹن (ر)صفدرکو اڈیالہ جیل منتقل کردیا گیا ہے۔

تفصیلات کے مطابق ایون فیلڈ ریفرنس میں سزا یافتہ ملزم کیپٹن (ر) صفدر کو احتساب عدالت نے ایک سال کے لئے اڈیالہ جیل بھیج دیا اس سے قبل انہیں انتہائی سخت سیکورٹی میں عدالت میں پیش کیا گیا تھا اور عدالت کے اطراف سیکورٹی کے انتہائی سخت انتظامات کئے گئے تھے ۔

ذرائع کے مطابق نیب کی استدعا پر اسلام آباد کی احتساب عدالت نے ایون فیلڈ ریفرنس میں گرفتار مسلم لیگ (ن) کے مرکزی رہنماکیپٹن (ر) صفدر کو اڈیالہ جیل منتقل کردیا گیا۔

ذرائع کے مطابق اڈیالہ جیل میں طبی معائنے کے بعد کیپٹن (ر) صفدر کو بیرک میں بھیج دیا گیا۔ کیپٹن صفدر کو جیل میں بی کلاس دی گئی ہے اور انہیں ایک مشقتی خدمت گار بھی دیا جائے گا۔ ذرائع کے مطابق کیپٹن صفدر کو جیل میں ٹی وی اور فریج کی سہولت بھی حاصل ہوگی۔