ن لیگ نےنوازشریف کی آمدپراحتجاج کا پلان تیار کرلیا

لاہور: مسلم لیگ نون نے نوازشریف کی وطن واپسی کے موقع پرلاہور میں احتجاج کا پلان تیارکرلیا ہے اورانتظامات کو حتمی شکل دے دی ہے۔

ذرائع کے مطابق شہبازشریف کی قیادت میں ن لیگ کا قافلہ لوہاری گیٹ  بھاٹی چوک اورانارکلی سے ہوتا ہوا مال روڈ پہنچے گا ۔

ذرائع نے بتایا ہے کہ شہبازشریف اورحمزہ شہبازسمیت اہم لیگی رہنماؤں کیلئے جدید سہولتوں سے آراستہ بلٹ پروف ٹرک کرایے پرحاصل کرلیا گیا ہے جس میں ایئرکنڈیشنر ، واش روم ، ایل ای ڈیزاورمانیٹرنگ کے انتظامات ہیں جبکہ ٹرک میں وائی فائی سسٹم بھی نصب ہے ۔اس ٹرک میں بیڈ اورصوفے بھی ہیں ۔

ذرائع کے مطابق نوازشریف اورمریم نوازلندن سے نجی پرواز کے ذریعے 13 جولائی کو صبح 7 بجے ابوظہبی پپہنچیں گے اور پھر ابوظہبی میں 7 گھنٹہ قیام کے دوران غیرملکی وفود سے ملاقاتوں کا بھی امکان ہے ۔

ذرائع نے بتایا ہے کہ نوازشریف کی غیرملکی وفود سے ملاقات میں نیب کا پلان بھی زیرغورلایا جائے گا۔ یہ بھی معلوم ہوا ہے کہ نوازشریف کے ہمراہ غیرملکی سیاسی مبصرین اورصحافی بھی لاہورپہنچ رہے ہیں۔

ذرائع کا کہنا ہے کہ مسلم لیگ ن کی کوشش ہے کہ نوازشریف اورمریم نوازلاہورایئرپورٹ سے باہرنکلنے میں کامیاب ہوجائیں جبکہ نوازشریف کی گرفتاری کی صورت میں ریلی کا رخ راولپنڈی کی طرف موڑدیا جائے گا۔

ذرائع کے مطابق نون لیگ نے نوازشریف کے استقبال اور ریلی کیلئے تمام انتظامات کو حتمی شکل دیدی ہے اوربلدیاتی نمائندوں کو اہم ذمہ داریاں سونپ دی گئی ہیں۔