انٹرنیشنل ہاکی فیڈریشن کی پاکستان کو ویزا جاری کرنے کی یقین دہانی

انٹرنیشنل ہاکی فیڈریشن نےیقین دہانی کرائی ہے کہ رواں سال بھارت میں شیڈول ہاکی ورلڈ کپ کے لیے پاکستانی ٹیم کو ویزا کے حصول میں کسی قسم کی مشکلات پیش نہیں آئیں گی۔
اس حوالے سے پاکستان ہاکی فیڈریشن کے سربراہ بریگیڈیئر ریٹائرڈ خالد سجاد کھوکھر نے میڈیا سے گفتگو کرتے ہوئے کہا کہ ویزا کے حصول کے حوالے سے ایف آئی ایچ کے سربراہ نریندر بترا سے ہماری تفصیلی بات چیت ہوئی اور ان سمیت تمام آفیشلز نے ہمیں ہدایات دیں کہ ورلڈ کپ کے ویزا کے لیے پاکستانی کھلاڑیوں اور سپورٹ اسٹاف کی درخواستیں جمع کرانے کا کام بروقت شروع کردیں تاکہ ویزا کے اجرا میں کوئی مسئلہ نہ ہو۔
واضح رہے کہ ہاکی ورلڈ کپ کا 14واں ایڈیشن رواں سال 28نومبر سے 16دسمبر تک بھارت کے شہر بھوبھنیشور میں منعقد ہو گا جس میں پاکستان سمیت دنیا کی 16ٹیمیں شرکت کریں گی۔