یمن سےسعودی عرب پرشیلنگ میں بچے سمیت 3 افراد زخمی

ریاض: یمن سے سعودی عرب پر داغے گئے میزائل کے ٹکڑے لگنے سے 3 شہری زخمی ہوگئے ہیں۔

بین الاقوامی میڈیا کے مطابق یمن کی حکومت پرقبضہ کرنے والے حوثی باغیوں نے سعودی عرب کے صوبے جازان کے سرحدی ضلع العارضہ پرشیلنگ کی جس کے نتیجے میں ایک بچے سمیت 3 افراد زخمی ہو گئے ہیں۔ زخمیوں کو قریبی اسپتال منتقل کردیا گیا ہے جہاں دو زخمیوں کی حالت تشویشناک ہے۔

جازان صوبے میں شہری دفاع کے میڈیا ترجمان یحیی عبداللہ القحطانی نے کہا ہے کہ زخمی ہونے والے دو نوجوانوں کی عمر20 سال کے قریب ہے اورتیسرے بچے کی عمر دس سال ہے۔

واضح رہے کہ یمن میں جاری خانہ جنگی کے دوران حوثی باغیوں اور سعودی اتحادی افواج کے درمیان جھڑپوں میں سیکڑوں افراد جاں بحق ہوچکے ہیں جب کہ ہزاروں خاندان دربدر ہوگئے ہیں۔