گرم ہوا چلی تو چوہدری نثار انگلی چھڑا کر بھاگ گئے۔پرویزرشید

راولپنڈی: مسلم لیگ (ن) کے رہنما پرویز رشید نے کہا ہے کہ گرم ہوا چلی تو چوہدری نثار انگلی چھڑا کر بھاگ گئے۔

راولپنڈی کے علاقے دھمیال میں سینیٹر پرویز رشید نے تقریب سے خطاب کرتے ہوئے کہا کہ بغاوت بہادر کرتے ہیں، چوہدری نثار بھگوڑے ہیں، جو دم دبا کر بھاگ جاتا ہے، نواز شریف پر گرم ہوا چلی تو چوہدری نثار انگلی چھڑا کر بھاگ گئے۔

پرویزرشید کا کہنا تھا کہ نواز شریف پر کرپشن کا کوئی الزام نہیں، سپریم کورٹ نے 300 ارب کے الزم میں سزا نہیں دی بلکہ اقامہ پر دی، احتساب عدالت نے 300 ارب کا الزام ٹھکرا دیا۔ عمران خان کو ہیلی کاپٹر کیس میں بلایا لیکن وہ نہیں گئے، نواز شریف، مریم نواز، کیپٹن صفدر، حنیف عباسی اور قمرالسلام کو یہ چھوٹ کیوں نہیں ملی؟

ان کا کہنا تھا کہ 4 دن پہلے حنیف عباسی کا فیصلہ سنا کر چوہدری نثار اور شیخ رشید کیلئے راستے ہموار کئے گئے، یہ راستے صاف نہیں کر رہے راستے میں کانٹے بچھا رہے ہیں۔