ائیر چائنا کی پرواز دھمکی کےباعث پیرس میں اتار لی گئی

بیجنگ:چین کی قومی فضائی کمپنی کی پرواز دہشت گردی کی دھمکی کےباعث پیرس میں اتار لی گئی۔عرب ٹی وی کے مطابق یہ پرواز پیرس سے بیجنگ کے لیے روانہ ہوئی تھی اور اس کو اڑان بھرنے کے تھوڑی کے بعد ہی پیرس کے بین الاقوامی ہوائی اڈے پر واپس لے جایا گیا۔ائیر چائنا نے چین کی سوشل نیٹ ورکنگ سروس ویبو پر اپنے سرکاری اکاؤنٹ پر جاری کردہ ایک بیان میں کہاکہ ائیر چائنا کو دہشت گردی کا ایک مشتبہ پیغام موصول ہوا تھا۔اس کے بعد پرواز سی اے 876 کو پیرس میں واپس اتار لیا گیا ہے۔

عملہ اور تمام مسافر بالکل خیریت سے ہیں تاہم بعد میں چین کے سرکاری میڈیا نے اطلاع دی ہے کہ یہ معاملہ ایک غلط الارم کی بنا پر پیش آیا ہے۔اس پرواز کے ریکارڈ کے مطابق اس وقت طیارہ بیلجیئم کے دارالحکومت برسلز کی فضائی حدود تک نہیں پہنچا تھا اور پھر وہاں سے اس کو واپس پیرس لے جایا گیا۔ائیر چائنا کا کہنا ہے کہ اس پرواز کو مسافروں اور عملہ کے تحفظ کے پیش نظر واپس اتار ا گیا تھا۔