داعش سرغنہ البغدادی کی دماغی موت واقع ہو چکی

بغداد:عراقی سیکورٹی ذرائع نے بتایا ہے کہ رواں برس جون میں شام کے اندر عراقی فضائیہ کے ایک حملے میں زخمی ہونے کے بعد داعش تنظیم کے سربراہ ابوبکر البغدادی کی دماغی موت واقع ہو چکی ہے۔ انٹیلی جنس ذرائع کے مطابق عراقی فضائیہ کے طیاروں نے جون میں مصدقہ انٹیلی جنس معلومات کی بنیاد پر شامی سرزمین پر داعش تنظیم کے رہ نماؤں کے ایک اجلاس کو نشانہ بنایا تھا جس کے نتیجے میں وہاں موجود کئی کمانڈر مارے گئے اور دیگر زخمی ہو گئے تھے۔ذریعے نے بتایا کہ زخمی ہونے والوں میں داعش کا سرغنہ ابوبکر البغدادی بھی تھا۔ شدید اور گہرے زخموں نے اس کو دماغی طور پر مردہ کر دیا ۔

مذکورہ ذریعے نے البغدادی کی جاں نشینی کے حوالے سے تنظیم کی قیادت کے درمیان اختلافات کا بھی انکشاف کیا ۔ ذریعے کا کہنا تھا کہ داعش کے بعض غیر عراقی رہ نماؤں نے البغدادی کی جگہ ابو عثمان التونسی کو نامزد کیا ہے۔ اس کے سبب تنظیم کی صفوں میں غیر مسبوق نوعیت کے شدید اختلافات اور انقسام دیکھنے میں آ رہا ہے کیوں کہ عراقی رہ نماؤں نے التونسی کی نامزدگی کو مسترد کردیا ہے۔