دنیا بھر سے فرزندان اسلام کی حج کیلئے مکہ مکرمہ آمد کا سلسلہ جاری

دنیا بھر سے آنے والے فرزندانِ اسلام کی حج کے لیے مکہ مکرمہ میں آمد کا سلسلہ جاری ہے،رواں برس 20 لاکھ کے قریب افراد فریضہ حج ادا کریں گے۔
سعودی محکمہ پاسپورٹ کے ڈائریکٹر جنرل میجر جنرل سلیمان الیحیٰی کے مطابق داخلی عازمین کی تعداد 2 لاکھ 33 ہزار سے تجاوز کر گئی ہے اور اب تک 18 افراد کو حج پرمٹ کے بغیر مکہ مکرمہ جانے پر گرفتار کیا گیا ہے۔
انہوں نے ہدایات جاری کیں کہ مکتب کے مخصوص وقت کے مطابق اور اپنےگروپ کے ہمراہ سفر کریں جب کہ بسوں اور ٹرین پر سوار ہوتے وقت خواتین، معذور اور ضعیف افراد کو ترجیح دی جائے۔
سعودی عرب میں تعینات پاکستانی ڈائریکٹر جنرل حج ڈاکٹر ساجد یوسفانی کے مطابق منیٰ اور مزدلفہ میں بیک وقت 25 لاکھ مسلمان قیام کریں گے۔
انہوں نے عازمین حج کو ہدایات دیں کہ رش کے باعث سعودی حکام کی طرف سےحرم ٹرانسپورٹ 5 تا 15 ذی الحج کے لیے بند ہوتی ہے اور عازمینِ حج سخت ایّام کے لیے ذہنی وجسمانی طور پر تیار رہیں۔
ان کا کہنا تھا کہ حجاج کرام سبز اسکارف پہنیں اور پاکستانی معاونین کی ہدایات پر عمل کریں۔
واضح رہے کہ اس سال سعودی حکام نے فرزندان اسلام کے لیے خصوصی سہولیات فراہم کی ہیں، تاکہ مناسک حج کی ادائیگی کے دوران کسی قسم کی دشواری کا سامنا نہ ہو۔
اس سلسلے میں ایک ہیلپ لائن کے قیام کے ساتھ ساتھ خصوصی حج ایپ بھی متعارف کروائی گئی ہے۔
سعودی وزیر نے مکہ مکرمہ میں ایک نیوز کانفرنس کے دوران بتایا کہ وزارت نے کسی بھی قسم کی شکایات یا معلومات کے حصول کے لیے ایک نمبر 8004304444 مختص کردیا ہے اور تمام عازمین کسی بھی شکایت کی صورت میں اپنے اسمارٹ فون کے ذریعے اس نمبر پر کال کرسکتے ہیں۔